世事難測 - 左丁山
2016年最後一天，有甚麼可懷念之處？一時之間想不出，最後就以2016年12月9日下午3時半作為最值得記住嘅時刻，梁振英宣佈不尋求連任噃，一言震驚全香港，真係發夢都估唔到，比葡萄牙贏歐國盃，特朗普競選總統勝利還要驚奇。
書枱右上角留住一張2015年12月31日嘅「金融時報」嘅來年預測（即回顧2015、前瞻2016），今日睇番，有邊一項預測準確呀？嚡，唔係多嘅咋！
（一）希拉莉擊敗告魯士（Ted Cruz）當選美國總統。錯晒。
（二）英國公投不會贊成脫歐。錯晒。
（三）敍利亞總統阿薩德12個月後仍否在位？會。啱咗。
（四）英國銀行不會在2016年加息。啱咗。
（五）G20國家之中，有至少一個國家要求IMF救亡。錯，係冇呀。
（六）默克爾夫人在年尾不會在位。錯，呢位女強人仍然話緊事。
（七）比利時會贏2016歐國盃。錯晒，葡萄牙至真。
（八）中國會令人民幣貶值。至啱係呢項。
（九）高賓仍然會係工黨黨魁。啱，高賓抵得住壓力。
（十）安倍經濟學唔會肥佬。只啱一半，日本經濟在2016年仍然冇乜生氣。
（十一）俄羅斯運動員可參加里約奧運。啱一半，有不少運動員因服禁藥被禁止出賽。
（十二）白蘭特期油油價在年尾高過50美元一桶。勉強算啱。
上述大事，有啱有錯，但最重要嘅三項足以影響世界局勢嘅：希拉莉、脫歐與默克爾夫人，全部都錯，可見得專家預測呢回事，係幾咁冇譜，加埋香港梁振英事件，明年大家都無謂相信任何理性政治分析咯，因為人心與民意太難捉摸，集體意志係情緒之反映，不一定係理性思考之結果。預測經濟事務呢，估啱嘅機會多啲，因為一涉及國家庫房或私人荷包，大家就會理性好多，講錢唔講面子嘅時候，世界和平嘅機會就大好多。2017年係好難預測嘅，美國有咗一個特朗普總統之後，政策隨特朗普思維而變，從好嘅方面睇，佢係大有錢佬，樣樣講慣金錢與利潤，唔會為咗政治而破壞世界秩序，但從壞方面諗，佢係一個話慣事嘅富二代闊少，唔慣俾人窒親，與中國習核心分分鐘有口舌之爭（中國講面子多過講銀紙），一於鬥大，嚇死平民，令香港股市起伏不定，散戶投資者因住成為犧牲品。
上一則: 「政治不正確」的老兵 - 陶傑
下一則: 今年的聖誕禮物是一張收據 - 曾志豪
I
没有评论:
发表评论