【汽車籽】一代越野王停產 粉絲難捨Defender
一代越野王Defender停產 粉絲無懼劏車望人在車在
【汽車籽：馬路起義】
走過68個年頭，英國一代越野名車、產自Land Rover的Defender剛於上月29日停產。不說不知，Defender盛載了不少殖民時代的回憶，因為它的前身——Series車系，曾是英軍和香港皇家警察等政府部門的專用車。可惜歲月不留人，兩位本地粉絲惟有以自己方式緬懷一番，儘管愛車面臨被劏命運，依然不離不棄，更言：「我希望可以好好保存呢架車，直至我唔喺度。」
陳福賢 太子九十年代開始玩越野車，曾擁有6架Land Rover汽車，現時只餘兩架，亦是香港越野路華四驅車會的資深成員。
問到太子（左）及Nissing鍾情越野車的原因，二人不約而同說是那份攀山涉水的粗獷。
鄧陽鴻 Nissing具廿多年玩越野車的經驗，於2006年購入首批引入香港的Defender，亦是香港越野路華四驅車會的前會長。
有近70年歷史的Defender，是由Land Rover的軍車Series I、II及III所演變而來，1984年正式命名，不但有短陣90和長陣110，還有90開篷、110 Pick Up及130等車型。回歸前，英軍、警察及其他政府部門均有採購此車來代步，但一般市民卻難以擁有，主因是沒有代理出售。Defender的死忠陳福賢（太子）憶述當年要以自己方式買車，過程極其困難，「我喺1998年先買到，當年嘅Defender 90，畀市民買嘅全香港得5架，其他都係軍方嘅，我曾經問過代理，但佢哋都話冇得賣。好彩之後仲有兩架嚟香港，我可以買到其中一架，之後當然帶住佢周圍走啦，甚至帶埋佢行勻成個大陸。」
後來，太子又添購一架Defender 110及50周年版的Defender 90，一直收藏至今，對於停產，他也難掩失望之情，大嘆沒有必要，「我同車會嘅朋友們曾經去過Solihull（位於西密德蘭郡，鄰近伯明翰）車廠參觀，其實呢架車嘅製作流程好簡單，真係唔值得停產，實在太多人鍾意啦。車價本身實在唔貴，𠵱家停咗真係好可惜，而且好多人都擔心零件方面嘅供應問題。」
最後一台Defender於英國Solihull的工廠出廠後，標誌着一代名車的正式告別舞台。
拉薩拋錨 朋友寄零件更換擁有極強越野性能，更盛載了一代回憶的名車，為何落得停產？另一位死忠鄧陽鴻（Nissing）認為死因是追不上時代，「市場變得太快，以前啲車係幾年先轉一次款，𠵱家係一、兩年就轉款，等用家買新車系，或者係有外形上嘅轉變，例如Jeep都轉咗好多款，就係為咗迎合新一批年輕人要嘅味道。」其實早有不少車媒指Defender的設計無法通過歐盟日漸收緊的環保條例，安全性亦不及如今的新車，Defender會被時代淘汰似是情理之中，所以當第2,016,993架Defender於上月29日出廠後，車廠正式決定停產。
儘管失望，停產卻沒影響他們的熱情，問到為何鍾情Defender，二人嘴角不禁上揚，Nissing笑言外形足以讓他迷戀； 太子則說自小喜愛越野車，喜歡Defender的粗獷線條及強勁性能，「有次揸住Defender喺拉薩自駕遊，行緊嗰陣突然漏水，咁我就打畀Land Rover，問佢哋可唔可以諗辦法帶啲零件嚟。得意嘅係，我朋友都有呢架車，咁佢就將副引擎拆咗落嚟，同其他零件一齊寄畀我，修理好之後馬上繼續我嘅旅程。」無數經歷，加上深刻感情，太子由對汽車零件全無概念，到現時只需聽到聲音，便可知道機件是否出現問題，沒有愛，那會如此了解。
無懼劏車命運 誓要起死回生不過，生離死別似是無可避免，因為大多Defender都是柴油引擎，只有少數例如太子的50周年版Defender 90是採用電油引擎，由於柴油Defender必須登記為輕型車，要於15年後劏車，Nissing於2006年購入的Defender 110便要面臨這一困局，「好可惜，人哋呢啲車款係可以玩過世嘅，講句唔好聽，我個人唔喺度，車依然存在，因為佢唔係行電子，全部行機械式，所以壞嘅機會好細。」就是那份感情，足以讓車主想盡辦法讓它死而復生，「到時睇吓可唔可以同古董車會申請，睇吓可唔可以申請豁免。我哋亦有計劃喺Defender 70周年嗰陣送架車返英國廠，因為架車過唔到歐盟三期嘅環保標準，睇吓廠方可唔可以將佢改裝成歐盟四期，因為歐盟四期就可以脫離呢個死線。」萬一真的不行呢？「我都唔願劏車，唔會拎番嗰七萬幾元，寧願到時放喺車房，或者每次出去都掛個T牌去爬山。我希望可以好好保存呢架車，直至我唔喺度。」
男人的浪漫，你未必能夠充份理解，但當香港的殖民地色彩日漸褪去，快要停產的Defender，其代表的並非只是一代越野名車般簡單。
50周年版本Defender 90
大部份Defender都是柴油引擎，但這台50周年版則是電油加自動波，極罕。
除了電油引擎，採用自動波亦是其特色之一。
限量500架，每架車都會刻上數字，這一架是第434。
Defender 110
這台貼滿貼紙的Defender 110正是Nissing愛車，10年車齡依然狀態良好。
歷代經典款式Defender的款式雖然不多，但六十多年來有不少經典，停產後，廠方亦會推出車型相近的新作，影響力依舊。
在殖民地時代，香港皇家警察曾以Land Rover的Series車系作警車。
約於1983年面世的Defender 110 Pick up較為罕見，軍佬味更濃。
為了紀念Defender產量達200萬，官方去年推出紀念車款Defender 2,000,000。
傳於2018年推出的後繼車款已有照片流出，雖未正式確定，但是從中可見它與傳統、經典完全沾不上邊。
簡單耐用為耕田說到Defender的傳奇，怎可遺漏它的誕生過程？二戰後，英國農業一蹶不振，當時的Land Rover以出產房車而聞名，但是為了方便農夫工作、推動農業發展，得研發一台耐用、性能強大的汽車。他們不但參考了Jeep，為了保持實用及耐用度，車身設計更以簡單為主，造就了Series I。自1948年推出後，1958年銷量已達20萬台，Series I的成功亦加速了Series II、III及110等的出現。
1950年，英國Solihull工廠的Series I生產線已頗具規模。
記者：梁立勤
攝影：鄧鴻欣
編輯：陳國棟
美術：孔文彬
上一則: 【扮靚籽】化妝師鬥快手 3分鐘執靚返工
下一則: 【呠呠趣】M2充當安全車 戰紋型到絕
