林鄭必勝？ - 左丁山
資料圖片
廣東俗語有「唔嫁又嫁」一詞，指一個人唔嫁，並非一定講女士不願嫁，而係泛指起初講一樣，跟住轉軚。譬如一位球員明明話效忠母會，一定唔會轉會，但最後受不住外間高薪誘惑，卒之轉會，就會俾人唱：「球星Y唔嫁又嫁。」
依家少人講呢樣囉，講轉軚，跪低，反悔，反覆反口會多啲，文雅啲就係講出爾反爾。有人講「我N屆唔選特首」，但睇見有機可乘，就衝紅燈參選，就係一個例子。一月十六日，林鄭月娥女士正式宣佈參選特首，左丁山睇電視直播記者會；唔知點解，立即諗起唔嫁又嫁呢四個字。
以林鄭月娥身份地位，當然大有資格競選香港特別行政長官一職，但呢次並非千呼萬喚始出來，而係扭扭擰擰一早講咗「官到無求膽自大」，見到梁振英突然宣佈不連任之後，仍然唔肯表態，直到最近先至辭去政務司司長一職，等中央批准，立即宣佈參選。過去一個月嘅事態發展證明，林鄭絕對係梁振英之Plan B，係一個坐在冷板凳上嘅大後備，等一位正選球員支持唔住要出場治傷嘞，先至匆匆忙忙熱身上場。而一個人可以成為梁振英嘅Plan B，當然係與梁振英理念相同，梁振英認為佢可以承傳政治遺產（legacy），唔會破壞佢五年當政嘅方向之故。譬如奧巴馬，在美國總統大選全力支持希拉莉，為希拉莉拉票，就係想希拉莉唔會廢除Obamacare及其他政策，誰知希拉莉大熱倒灶，特朗普上台，就會動手撤除Obamacare，奧巴馬痛在心裏，令新舊政府交接過程出現不少暗湧。梁振英大力支持林鄭，道理與奧巴馬支持希拉莉相同。
假若林鄭順利得勝遷入禮賓府，梁振英得以達成「次佳」（second best）目標，會係最高興之人，中聯辦亦會鬆一口氣，可以向北京交代。林鄭如劉兆佳教授所言係中央屬意嘅人物，所以香港人都睇得出，中央遲遲不批曾俊華辭職，係要等埋林鄭，已釋放出一種訊息，中央喜歡林鄭多啲。目前有四個人會參選，據一啲政治記者對左丁山講，胡國興係outlier，冇人理，葉劉本是建制派，好忠心，但中聯辦嫌佢不緊跟梁振英，曾俊華有純西方教育背景，只有林鄭信奉梁振英既訂路線，比較信得過。林鄭得西環、得董建華、得梁振英力捧，建制派選委是否全部歸邊，令林鄭風光風光，攞800票當選？還是魚生粥僅僅熟，攞601票呀？假若最後馬失前蹄，兩位特首加張曉明可以返鄉下咯。
上一則: 為什麼你們罵林鄭呀？ - 陶傑
下一則: 變節？言重了 - 林夕
I
没有评论:
发表评论