林鄭選特首？ - 左丁山
「星島日報」上星期獨家報道林鄭月娥今日1月12日宣佈辭職，準備競選下一屆特首。「星島」本來就係政府消息權威，似有大內熱線咁款，獨家報道幾乎次次準，但12月9日就俾梁特打了一記悶棍，竟然宣佈不尋求連任，事先全港傳媒都唔知，包括星島在內，搵CY做個friend都搵唔到益處。
咁呢次林鄭消息準唔準呢？可能今早閱報已有分曉，但林鄭有意競選特首，已非新聞，連盲嘅都可以睇到動靜，今日係曾俊華辭職滿月，中央遲遲唔批准佢辭職，意思好清楚啦，就係向莊曾示以紅燈，唔想佢參選，擺明中央唔放心俾一位曾蔭權愛將、曾入美國籍、在美國受大學教育嘅西方思維人物統領香港。呢次本土派或者會覺得高興，一位本土人士、香港大學土產出的，勝過MIT、哈佛來路貨，港大「學苑」係本土派學生大本營，理應發表社論歡呼CY去、CL來，為港大增光。
林鄭曾經講過「官到無求膽自大」，現在就係「官到有求我自為」，在立法會大講三十年來係一個有為官員，一個有judgement嘅官員，為香港爭取西九故宮博物館知其可為而自為之，充份表現好打得一面，唔怪得在電視所見，林鄭少有正視泛民議員，一於當佢地係噪音。早前佢話保密做到滴水不漏，沒有諮詢的基礎，到立法會答議員質疑，就話老早有諮詢計劃，並無轉軚跪低，其能言善辯之能力，猶勝梁特，直情有資格做特首啦，如果真係做得成嘅話，2017至2022年，特區政府會更加大有為，女強人當權，往往比男人更加霸道，唔係點可以打破玻璃天花板呀。
林鄭好耐以前又曾經講過，要做下屆特首，應該先有一個班底讓市民（其實係選委）知道候選人有乜人才撐場，知所選擇。呢樣或者係吸取梁特嘅教訓，梁特在2012年衝紅燈，得董貴人扶持，撼低大熱門唐少之後，始發覺不少叻人已在唐營，於是組班比較狼狽，連吳克儉都搵埋做教育局長，財金系統繼續由曾蔭權馬房人士主理，都幾唔情願㗎，到頭來仲造就咗莊曾有近五年時間活躍於政府及國際關係網絡，增加咗做特首嘅本錢㖭。今年林鄭斷不會如此慌忙，中環人士傳出消息，指林鄭治港班底已有名單，主力人物會係林煥光做政務司司長，馬時亨做財政司司長，周松崗做行政會議召集人，至於競選辦阿頭夏佳理因輩份高，年事高，享福之際，未必會入閣做律政司司長㗎，但對出任人選會有say咁講，呢類傳聞，全部無人確認，到頭來是否成事，尚有不少變數，但林鄭明顯係中央目前撐腰嘅人選，識時務的俊傑，尤其是地產商紛紛行緊埋去。
上一則: 色相大千 - 陶傑
下一則: 故宮，你知道你今天的變化嗎？ - 曾志豪
I
没有评论:
发表评论