土豪買球星 - 左丁山
國家外匯管理局嚴限內地居民每年購匯五萬美元，不得在境外用作買人壽保險、置業、炒股等等。限購數目雖小，政策大方向就好明顯：嚴打走資。
話就係咁話，但事情好矛盾。在馬場沙圈碰到一位銀行家，佢話香港銀行不會做按A股借人民幣或港紙嘅生意，因風險太大，近大半年亦無興趣傾內地公司境外投資項目，因內地已百分之一百揸緊審批境外投資，普遍方法係冇明令不准，但要求批准嘅文件一遞上去審批當局，有關人等就似足半罷工狀態，一於唔理，有關文件一入侯門深似海，查詢一概無回應。
既然咁怕走資、嚴打走資，左丁山就非常唔明白，點解上海球會買外國球星，買得咁爽手呢？話出一億美元年薪收買C朗噃，C朗在皇馬正值黃金歲月期，唔肯應承之嗎。但車路士嘅巴西球星（未算世界級）奧斯卡近三個月長居後備席，上海上港集團足球俱樂部就以6000萬美元轉會費收購之，私人周薪40萬英鎊，比C朗、美斯還要高薪。上海申花又癲咗，用1100萬美元收購過氣阿根廷球星泰維斯，俾周薪61.5萬英鎊，直情離晒譜，奧斯卡還算當打，泰維斯年逾30，在歐洲已無法立足，上海申花以天價人工請佢，所謂何事？
車路士教練干地（Conte）曾係意大利球星，意大利國腳，祖雲達斯及意大利國家隊教練，見過世面，經驗豐富到極，賣走大後備奧斯卡，收回6000萬英鎊，賺到笑之餘，亦忍唔住講一句話，諷刺中國。就係You have to respect money！言下之意，當銀紙唔係錢，係要小心後果嘅。現在中超已成為世界二綫球星、過氣一級球星嘅最後搵銀天堂，臨收山前到中國賺番一大筆，係中國土豪球會老闆先至有咁慷慨。但要知道，踢足球係11個人合作嘅，不能單單依靠一個身上鋪黃金嘅球員，其他相對低薪中國球員會點諗？會唔會為泰維斯鋪橋搭路，為佢搶波餵波？怕好難咯！中國國家外匯管理局唔知有冇嚴格審批呢啲球會嘅外匯使用額度呢？中超再係咁大花筒，以後盲搶法比加斯、朗尼、耶耶托尼、大衞施華呢類30歲左近球星，外管局要唔要嚴查至得？不過外國球員唔駛笑得太高興，以前杜奧巴加入上海申花搞到冇糧出，不歡而散呀！
上一則: 給「長城」拆磚頭 - 陶傑
下一則: 黃之鋒很重要嗎 - 林夕
I
没有评论:
发表评论