保送林鄭 - 左丁山
田北俊在now電視（二月二十八日）講：有些選委本來是支持曾俊華，給他提名票的，後來收到電話，聽完後便改變主意。主持人問他這是傳聞還是經歷？田北俊醒目到極，立即笑說：「我聽到傳聞啫。」
田北俊跟政圈人脈網絡，一定比我哋多，佢聽到嘅傳聞，可靠性實會高過左丁山聽到嘅，一啲連左丁山聽都聽到嘅嘢，田大少豈會不知。今年嘅特首選舉，背後勢力之勇猛，遠遠超過從前，保送林鄭入禮賓府之人，出勢出力，出口出面，務求建制派選票一票不能失，盡量以高過689票，最好係800票以上勝出。林鄭咁樣就進入禮賓府，不知會否撫心自問，有幾多成真係靠自己嘅魅力？如果佢嘅民望在22日之內不能超越曾俊華，真係得之有愧！（明報委託港大民意研究計劃調查顯示，曾俊華之二月份市民支持淨值方面高出林鄭35.7個百分點）。本來林鄭月娥當官時，擁有高民望，與曾俊華相差不遠，點解今日落後咁多呢？道理一字咁淺，就係普通市民睇唔順眼佢得到董建華、梁振英與張曉明嘅奮力支持，可以食「殘廢餐」就做到特首。
大部份市民條氣唔順都冇辦法，下屆特首九成係林鄭，香港人會再過五年心裏悶悶的生活。一位老友話以後幾年多啲去遊船河，周遊列國，盡量不理會，不操心於香港事情。有銀退休人士就可以咁樣嘆世界啫，其他人可以點呀？老友問及：「左丁山你又會點？」哈哈，呢樣幾容易，左丁山有賽馬熱情，有馬季就可消磨時間，一年忙足十個半月，每逢賽馬就躲在馬場廂房一角，那管得香港政治撕裂，到賽馬唞暑咯喎，咪去外地旅行，享受陽光與海灘囉。有幾位商界朋友係商界選委，呢輪聽電話聽到心煩，明明以前同財金系統熟絡，現在成日被強力勸告轉移陣營，心情十五十六。左丁山對佢地講，趙孟能貴之，趙孟能賤之，一切小心行事！朋友苦笑：「人在江湖，身不由己。鬼叫自己還要打滾多十年八年！」身不由己到連去馬場或高爾夫球場嘅時間都不能自己決定，生活有乜樂趣呢？不如索性洗濕個頭瞇埋眼跳落去，跟隨董梁林鄭系統，搵食多幾年，攞番個榮銜先啦！總之識時務者為俊傑，香港啲叻仔叻女識諗嘅啦！
I
没有评论:
发表评论