五年後懷念吳克儉 - 左丁山
退休公務員曾智華認為今月任滿嘅教育局局長吳克儉在任五年，成日出外旅行，名為推廣、考察、交流，平均每月一次，而上頭又肯批准，直頭係驚人舉動。曾智華做公僕三十年，間或出外，回來例必要遞交報告，說明外遊見過乜嘢人，傾過乜嘢事，有何要點要跟進，如何與對方繼續保持聯絡等等。現在呢位唔生銹退休公僕公開要求吳克儉公開佢嘅六十幾份出差報告，等納稅人睇吓，你估吳局長或政府會唔會照做呢？左丁山就認為難啲咯，枉費阿Luke曾一世勞碌，只識做，不識官府政治，做局長咁高級，邊等同小小電台節目總監咁受氣，出外回來要交report呀？阿碌你瞓醒未？
左丁山在1980年代，經常在東南亞飛來飛去call客，每次回來，報告未交，又再上機，卒之有一次俾內部稽核（internal audit）溫馨警告，於是每次在回程飛機時就揸筆寫報告，咪話冇stress！有此經驗，對阿碌向吳克儉提出之要求，好有同感。即使政府話係機密，不能將報告示眾，亦應該向立法會教育委員會閉門提交，以示有一個交代，否則納稅人為吳局長提供龐大旅遊費用，就十分冤枉。
不過有人包拗頸。一位校友做咗教師二十幾年，不時參加七一遊行，六四靜坐嘅，佢對左丁山講：「唉吔，吳局長走人咯，無謂搞佢，我情願佢留任做教育局局長，好過由蔡若蓮做教育局副局長呀！起碼吳克儉成日掛住旅行，對香港教育即使冇貢獻，亦唔會構成傷害，但蔡若蓮做副局長嘅內在傷害性好大，我好驚呀！」原來假如吳克儉留任，楊潤雄繼續做副局長嘅話，教育界唔會受到大衝擊，但吳去楊上，引入新副局長蔡若蓮則茲事體大，呢位校友教師話：「蔡校長根正苗紅，在香港教育界冇乜聲望，但在愛國學校、教聯會（傾左建制派）就係一位好有學歷嘅人物，所以西環睇起佢，捧佢同葉建源競選做教育功能組別立法會議員，大比數失敗後，可能心有不甘，於是西環係要擺隻棋落教育局。我地從相熟教育局官員聽到消息，楊潤雄根本同蔡若蓮唔熟，蔡若蓮做副局長，楊潤雄只能苦笑，根本無say，最恐怖嘅就係蔡若蓮做副局長只係熱身，五年後隨時係楊潤雄起身讓位，由紅色娘子蔡若蓮坐正做教育局局長呀，到時我地會好懷念吳克儉嘅嘞！」嘩，講到似層層，唔怪得未成事，未宣佈，已有幾千人網上聯署反對！
I
没有评论:
发表评论