退休快活人 - 左丁山
老友記曾智華自香港電台退休近三年，過完冷河，完全回復自由身之後，就一味搞嘢，唔係話佢寫稿賺外快呀，而係佢經常利用本身所長（為食），化食飯為善事，辦慈善飲食宴，哈，又俾佢搞得掂，搵到不少慈善捐款喎。退休前主持「晨光第一線」，為聽眾搞笑，退休後為食得起之善長仁翁帶來美酒佳餚，正是一生至今為止（佢起碼長命百歲）為人們帶來歡笑。
曾智華有英文名叫做Luke Tsang，老友索性叫佢做阿碌，符碌個碌，碌葛個碌！以前有間私立英文中學叫做St Luke（聖路奇），Luke之比較正式譯名係路加，聖經有「路加福音」Gospel of Luke，阿碌嘅中學母校係聖約瑟，英文名係讀書時改嘅。路加福音係記載耶穌生平最詳細嘅書，但我地阿碌似乎唔係虔誠教徒，佢最信嘅教條就係食食食！
臨近書展，阿碌出版咗一本書，叫做「快樂退休」，寫佢如何進入退休及享受退休生活，幾個禮拜前送咗一本俾左丁山，叫左丁山唔好掛住搵銀，應花多啲時間去旅行，飲食和做善事回饋社會。左丁山對佢講：「自己呢生人透過馬場搵馬會做中間人，已經捐咗不少善款嘅啦，好對得住天地良心，如果有你咁多空間時間，一定跟你周圍去。」
「快樂退休」共有六章：（一）加入快樂退休族，堅守十五條樂活守則；（二）身心健康下半場，如何維持健康面對突發突如其來之「老來病」，阿碌曾患抑鬱症、驚恐症、血壓高、眼中風等等，一一克服，有寶貴經驗可與人分享；（三）享受財富豐足的生活（如何搵到退休老本）；（四）跟老友老伴遊離香港，多去旅行；（五）重拾夢想，做一啲可以服務社會之事；（六）準備好說再見，準備後事，不用悲傷。
左丁山與阿碌相識三十年，近二十五年幾乎每月共吃晚飯一次，近年佢周圍飛，見面少咗，但對佢之樂觀生活態度，知之甚詳，好似佢當年患上抑鬱症，坦誠面對，講晒俾老友知，去威爾斯醫院搵李誠教授求醫，直至醫好，毫不隱瞞，癒後就周圍演講，教人勇敢面對呢一個精神情緒病，不少人得佢鼓勵，照辦，亦好番，多謝佢都嚟唔切！退休對好多男人嚟講，係一件好難面對之事，好怕人退茶涼，冇人睬佢，漸漸變成寡言寡歡易發脾氣，阿碌係真人示範樣辦，退休前就安排好老本，老伴，老友，有此三老，退休生活自然快樂不會沉悶。每一位已經退休或今年準備退休之人不分男女，不妨去書局搵本「快樂退休」讀吓，一定覺得退休後人生充滿快樂！
I
没有评论:
发表评论