打大鱷之憶 - 左丁山
因1985年家族公司瀕臨破產，得北水資金及時打救而避過一劫的董建華，從那時開始全面傾左，變成愛護中華人民共和國的大商家，也因此而改變了下半生的運程和人生路向，逐漸蛻變成為政治人物，由船王之後變成國家領導人級數，又曾任香港特首八年，影響力至今不衰，新任特首林鄭月娥視之為香港政壇大老。講命運八字嘅話，董建華生於1937年7月7日屬丁丑年丙午月乙未日，時辰不知，呢條命究竟如何奇特，如何先富後貴，左丁山唔識，有緣如果碰到紫微楊，私底下問吓學嘢都好。香港特區誕生之八字一般稱為丁丑年丙午月甲辰日甲子時（1997年7月1日子時），係唔係與董建華八字好夾呢？又係要向高人請教。
董先生既已成為香港政壇大老，仲未肯享受退休生活，還要組織「香港團結基金」，發揮影響力。最近佢在一個場合發表談話，不經意間透露一個秘密，就係在1998年8月14日香港特區政府宣佈動用外匯基金和土地基金正式入市買股及恒指期貨，入市「打大鱷」之時，董先生自己邀請北京干預香港，親自向外交部長錢其琛求救，錢其琛一口拒絕，指中央不會插手。董先生講秘密之原意，應該係話中央極之尊重一國兩制，嚴格遵守港人自治，所以香港人唔使怕中央不遵守一國兩制。
講就係咁講，但我地普通人聽起嚟，就覺得董先生在緊張關頭會腳軟，自己想邀請「清兵入關」來干預，美其名曰「救援」香港，實際上邊度有「香港人高度自治」嘅意識吖。
當年參與打大鱷及知情人士，今天仍然有在市場活動嘅。據一啲知情人士憶述，1998年8月，中國有外匯儲備406億美元，香港有外匯儲備約900億美元，以人口比例計，中國外匯儲備比香港還要少，並非2017年嘅光景。當年打大鱷由財政司司長曾蔭權領軍，金管局總裁任志剛、財經事務局局長許仕仁為輔，在最前線直接落盤嘅有金管局助理總裁葉約德及另外兩位女將。呢個團隊只係通知咗中國財政部，當時得到嘅簡單回應係：「盡量不要連累中央財政。」根本無意幫手，因中央手上儲備亦有限也。特區政府托市，曾一度托到手軟腳軟，好驚子彈用完，但香港有大運行，在緊急關頭之際，俄羅斯債務違約，LTCM破產，大鱷撤退，曾任許葉等人一額汗之餘，贏得勝利。以董先生之財政知識，竟然叫錢其琛幫手，若無曾蔭權掌舵，大鱷得咗米咯。
Z88
没有评论:
发表评论