無乜嘢我都係上市先 - 曾志豪
《100毛》上市，廢青變GD，毛孩變男神，傳統媒體羡慕妒忌恨。
由一張《黑紙》開始，變成𠵱家可能係一張股票！真係博一博，單車變摩托，仲要響喉俾全世界聽到嗰隻。
由《黑紙》開始，我都聽到身邊不少長輩，我強調是長輩，對呢個媒體的批評。
包括一張紙賣吓啲金句，出得幾多期啊。好啦有咗《100毛》雜誌，咁無聊嘅內容都係抄吓網絡雜文，唔掂嘅。
到《毛記電視》，只係照搬以前《歡樂今宵》嘅扮嘢惡搞節目，改吓歌詞唱吓口水歌，重複80年代的橋。
甚至《毛記》拍網絡廣告，轉型做廣告公司，也有人批評，沒有了《毛記電視》的content支持，齋做廣告公司，會失去影響力云云。
反正好像《毛記》媒體危機四伏。
但《毛記》卻要上市了，一句話要你閉嘴。
他們的橋是抄前人，但他們把舊橋賦予新力量，便是改歌詞賣廣告。
改歌詞一直是香港重要惡搞文化，由曾志偉林敏聰年代的「掃墓為掃墓」，後來的《姨婆掉眼淚》再去到高登仔的「概念大碟」例如甚麼《活佛viva》，惡搞改歌詞一直進行，《毛記》的確是重複前人舊橋。
但問題是，前人改歌詞純為惡搞為興趣得啖笑，最多呃like；《毛記》卻是改歌詞改到成為廣告橋段，我惡搞歌詞sell你的產品。以惡搞歌詞的洗腦效果來宣傳商品，開出一條新財路。所以網絡方面的收入佔毛記80%！
3個80後成功創業不出奇，但在人人都說寒冬、做唔住的傳媒業務做到賺錢，卻是一大奇蹟，也是一大諷刺。或許不是傳媒做唔住，而是你咁樣做傳媒做唔住；或許不是廣告萎縮，而是你的廣告萎縮。不過《毛記》以後還能以「廢青同路人」身份自居嗎？以前笑大台是一台獨大，今天，連公司都申請上市，或者他們也變成獨大的一個台了。
Z88
没有评论:
发表评论