一萬元的戰爭 - 曾志豪
我低價買了股王騰訊，最近升到火箭發射般高遠，內心一陣狂喜。
拿出算盤一計，甚麼？這隻股票升了幾十元，我原來才賺了一萬幾千。
我明白，因為我購入的股數少，只有寥寥三手咁大把。三手股票當然只能為你帶來一萬幾千的收入。
但我就是心生不忿，唔抵啊！一隻股票升咗幾十元！我又食正這個浪潮，居然只能賺得一萬幾千！實在太浪費了！
有人安慰我，一萬幾千也是錢，而且是你的淨收入，應該感到滿足。
我悻悻然反駁：升到歷史新高都只係賺得萬零蚊，覺得自己暴殄天物啊！
然後有個智慧人出來主持公道：如果隻股票倒跌四十幾蚊，咁你點算？
我第一時間反駁：「你把烏鴉口咪亂嚟！如果真係跌四十幾蚊，我仲唔X街？大嗱嗱無咗成萬幾銀！跳樓都唔掂！」
講完我才發現自己的可笑。如果升了四十幾蚊，我覺得那個升幅「一萬幾千」太少，無肉食。即是說，一萬幾千於我何用，猶如浮雲。
但如果是股票下跌，而我慘輸四十幾蚊，則那個損失便變成「無咗成皮嘢好肉赤」。
照計如果「一萬幾千是浮雲」，為甚麼我又會為虧蝕的一萬幾千而傷心難過呢？
這當然便是人的貪婪。
想得到得到了嫌少，總覺自己應該可以攞更多。那些霸佔官地的業主，本身的樓房面積已經大得驚人，即使不霸官地也是三代同堂無憂。但為何仍要霸？因為得到的永不嫌多，只會覺得自己霸得太少。但如果你要拆掉違規建築，就像割了他的肉，要了他的命。
追討賠償永遠不會嫌多，總覺賠幾多都是一筆小數目；叫你捐錢便不同，每一分一毫都像慘遭放血。
政府搞基建超支追加撥款，好像那些錢都是細數目，好輕鬆；要政府撥款搞好退休醫療房屋，錙銖必較，搞唔掂，下回分解。
Z88
没有评论:
发表评论