【汽車籽】兩噸巨無霸 GT加速似衝刺起飛
【汽車籽：新車落地】
一部接近兩噸的汽車，物理限制下跑得慢，係好應該；車長接近5米，軸距3米有多，欠缺靈活身手，亦好合理。偏偏，640iA加速力唔單止快到得人驚，在四驅系統協助下，過彎又快又穩定，做乘客的，又時刻都舒服到暈……
車頭設計接近新5系，鬼面罩內葉片可作電動開合，有效降低風阻；20吋輪圈及卡鉗均為M Sport Edition獨有配備。
沒錯，寶馬5系GT的確已成為過去式，但另一邊廂，廠方以6系GT重新命名，固然是希望與5系分家並提升形象，更重要的其實是外形上的變革。上一代5系GT最為人詬病的就是外形，賺到豪華舒適，卻輸掉外觀吸引力，因此新車在線條處理實行大刀闊斧求變。新車總長增加87mm，離地距及車尾高度分別下降21mm及64mm，配合重新設計的車尾線條及燈組，視覺上比5系修長，類似時下流行的sportback設計，望落的確有型了許多。
座位闊落舒適 頂級配備先進好用
6系GT車架結構源於短陣7系，所謂短陣，實際一點都不短，軸距足3,070mm，比5系長95mm，換來就是比5系闊落的後座空間，而且座椅角度可作電動調校，雙層頭枕質地又份外軟綿綿，加上氣氛燈情調一流，玻璃天幕車頂，做乘客簡直嘆到冇得投訴，當然，受傳動軸影響，中間位舒適度難免打些折扣。
新車車廂配備豪華，正是5系與7系的混合體，質料上乘的Dakota皮革及Poplar Grain Grey木材，可變色氣氛燈，佈置盡顯頂級車應有氣派；10.25吋屏幕可用iDrive旋鈕及輕觸式操作，還對應Gesture Control手勢控制，附設HUD顯示，亦配置了極先進的Surround View泊車系統，除了「基本」的前、後及鳥瞰畫面外，更可以全立體影像模擬汽車及周遭景物，既先進亦好用。
除多角度鏡頭外，泊車系統可設換成立體虛擬影像，方便監察四周情況。
對應Gesture Control手勢控制，最常用必定是控制音量。
電動尾翼可手動控制升降
三公升直6 turbo引擎輸出高達340匹，峯值扭力可於極低轉釋放，加速力強勁。
動力澎湃 峯扭極低轉全數釋放
640iA是現行GT頂級型號，香港版一律為M Sport Edition，包括專用20吋輪圈、擾流器及卡鉗，座椅及軚盤設計亦特別運動型。動力上，340匹馬力由三公升直6 turbo引擎提供，配置xDrive四驅系統，透過8速Steptronic傳送動力。車重接近兩噸，預計它「唔會快得去邊」？市區駕駛下的確揸得出正常的沉重感，但引擎低扭特強（450Nm），峯值扭力早至極低轉1,380rpm便全數釋放，稍稍向油門施壓，換來「估你唔到」的爽快加速反應，輸出豐厚兼具線性，動力澎湃，有客機起飛前的衝刺感覺，0-100km/h只需5.3秒。640iA駕駛感同樣正到飛起，車廂隔音及濾震能力保證令乘客滿意，轉至sport模式後軚盤變得沉實，油門及波箱同時處於亢奮狀態，最正是xDrive四驅既有寶馬轉向利落及靈活特性，又具備高速下的穩定性，絕對是一部舒適兼身手敏捷的大型豪華房車。
BMW 640iA xDrive GT M Sport Edition規格：
引擎：2,998c.c. 直6渦輪增壓
馬力：340PS/5,500-6,500rpm
扭力：450Nm/1,380-5,200rpm
傳動：8前速自動，四驅
售價：$1,099,000
查詢：BMW Showroom 灣仔告士打道108號光大中心地下
採訪：廖宏俊
攝影：徐振國
編輯：陳慧玲
没有评论:
发表评论