特首黑面 - 左丁山
追數王前星期在飯局聽見左丁山講林順潮威水史，靈機一觸，希瑪眼科上市第一日以第一時間掃貨，次日股價狂升，佢即刻出貨，係咁意就賺咗一筆，老友知道後，問左丁山賺咗幾多，唉，真對唔住，自己係說話派，識講唔識做，追數王可能追慣數，時時劍及履及，知道債仔在那裏，就立即行動，點似得左丁山咁講完，寫完，都未買入一股呢？
追數王聽得快，睇得精確，似係佢嘅追數DNA，呢日在飯局，佢問：「有冇人睇到電視畫面，林鄭特首黑口黑面？」又冇喎，走漏眼添。追數王話鄭若驊深夜（1月21日）發稿講南區物業僭建，林鄭月娥在1月22日晨早搭飛機去瑞士出席Davos世界經濟論壇，俾記者追問對於潘鄭新聞稿之反應，林鄭玄壇咁嘅面喎，顯然係好唔高興，或者心裏面好嬲都唔定。
左丁山冇見過畫面，但追數王素來觀人於微，應該冇乜睇錯嘅。飯後行到置地廣場買CIAK甜品，遇到一位法律界老友B，順口就講八卦，老友B話潘鄭僭建令人不安，雖則全港都有僭建，但律政司司長家裏有僭建，始終係其身不正，律政司司長在法律界失去respect，係幾難持續落去嘅事。佢又講到師兄劉進圖嘅文章，指鄭若驊在2008年金融海嘯之後，以超高價買入屯門海詩別墅，甚有疑點，將來查起來如無滿意解釋，都幾麻煩。
左丁山話：「法律嘅嘢，留番俾你地班師兄弟去討論，你有冇睇到電視畫面，見林鄭黑口黑面呢？」點知一講就中，老友B話：「我個朋友嘅朋友1月21日出席一個私人宴會，林鄭好畀面有出席，但後來話有事要早走，走得有啲匆忙。現在知道啦，原來當晚潘鄭要出新聞稿，可能林鄭要趕返去辦公室處理啩。如果你係佢，都會唔高興啦，難得有機會鬆一鬆，私人宴會與老友記傾吓偈，幾好呢，點知中途又要走人，為公事煩惱，第二朝晨咁早就撲去機場，記者唔識趣撲埋嚟問呢樣嗰樣，唔通仲會笑容滿面咩，我好同情特首呀！」我都話咗狗年將至，生肖屬雞者冇人幫手，樣樣食自己，林鄭上任後廢咗中央政策組，不設新聞統籌專員，唔知邊個係佢?政治及公關智囊呢，冇專人幫手諗計執行，好辛苦嘅啫，隨時做到病。
買完甜點，行經新世界大廈見到地產Y，標準藍絲帶也，平時與民建聯行得好埋，多口問佢：「你都係地產界，對潘鄭僭建又有乜睇法」，地產Y即刻冇咗微笑，低聲講：「呢位潘太搞得好論盡，回應又曳，我最驚佢同渣打銀行簽嘅按揭文件，有冇手尾跟，有就大鑊，佢非要離職不可！」如果剩得呢件，咁就小事啦，渣打銀行咁有政治警覺性，邊會主動生事吖。
没有评论:
发表评论