林鄭鋸箭 - 左丁山
午飯後行街，偶遇退休高官，同佢一齊行到去IFC，各自拜拜。短短五分鐘閒話，退休高官有精警點評，唔怪得佢做官嗰陣，冇議員咬得佢入。
左丁山打開話匣子，講及林鄭夠晒政治敏感度，有足夠警覺性，從太忙嘅時間表中，可能係搭長程飛機自瑞士回港啩，有幾個小時思考手頭上嘅問題，排好優先次序，所以一落機無耐，就諗出叫醫管局撥五億元作緊急用途，安撫護理人員，鎮住吓先，到了財政預算案出籠，先至由政府加撥五億元畀番醫管局。
呢條橋又幾好喎，一來平抑護士憤慨，二來避過向立法會申請五億元撥款會遇到嘅拉布問題，快手快腳搞掂，可見其精明。
高官笑笑口話：「林鄭曾任職財庫局，負責管錢，外國官員與財政部人員訪問香港，見司局長嘅話，會談及香港稅務及財政管理，講到細節就全由林鄭負責解畫，外國人對林鄭之熟悉情況及細節，稱讚不已，話佢醒目到極。現任司局長之中，若然涉及用錢撥款程序，一定冇人夠林鄭咁熟，所以佢諗到醫管局動用本身緊急基金，再由預算案撥回呢個方法，確係冇得彈。之不過咁，一個咁熟悉政府運作及程序之人大權在握，夠膽鑽程序空子，不依正常規矩（即向財委會申請撥款），是否市民嘅理想特首呢？程序公義以後是否只掛在口邊，唔駛理會？你地諗吓嘞！」
估唔到退休高官有如此想法，咁守原則。諗深一層，當今世界，人人掛住方便、便利、快速，嫌議會慢，嬲議會阻撓，索性以「實際」為理由，走捷徑去辦事，中文話走精邊，英文話cut corners，是否已成社會風氣，唔識嘅就係笨蛋迂腐？
林鄭係醒呀，但急用五億元來應付護理人員之沖天怨氣，其實係「鋸箭法」啫，此法出自李宗吾厚黑學，大家查吓就知。五億元頂住前線人員不滿，安撫一陣，猶如鋸去手臂上之一截箭，入咗肉嘅一截就當作睇唔見，當作冇事。其實內藏之箭，猶如護理人員數目嚴重缺乏，係一個更加要施手術來解決嘅難題，否則會有併發症，到時仲痛到標眼淚。林鄭一施鋸箭法，等於暫時唔再理，懶理，最後受害嘅咪又係中咗箭嘅護理人員及入醫院嘅香港市民！
没有评论:
发表评论