漁農界人少票多
2012年03月08日
本欄講根據 2011年人口普查嘅住戶收入資料，指香港家庭收入向上移，高收入戶數目大增，低收入戶比率有輕微下降，係一件好事。有幾位讀者來郵批評左丁山竟然唔用 real income（實質收入）而只係引用統計處之名義收入（ nominal income），完全忽視通脹之影響，當讀者係儍子。
講笑咩，蘋果讀者既多且叻，佢地當左丁山係儍子就得，人口普查簡要報告並無提供「經通脹調整後之收入」，只係話十年間通脹率超過 12%，坦白講，要一個寫稿佬自己做調整，實在冇時間，呢啲嘢要留番俾學院派研究員去做！
香港工作人口據「人口普查」， 2011年有三百五十四萬七千人， 2001年有三百二十五萬二千，增加咗二十九萬五千人，最令左丁山矚目嘅就係「漁農業熟練工人及不能分類的職業」在 2001年有 10,561人， 2011年只有 3383人，即使佢地全部係漁民農民，漁農工人只佔工作人口之 0.1%，簡值微不足道。
咁少人數都令左丁山矚目？梗係啦，人稱小圈子選舉之「選舉委員會」，共一千二百人，其中漁農界屬第三界別；與勞工、社福、體育、演藝、文化、出版同組，呢個界別分配到二百四十個選委席位，單係漁農界就有 60個，佔第三界別四分一，佔全體選委百分之五。乜嘢事呀，漁農業之產出總值佔香港本地生產總值不足百分之一；漁農工人佔工作人口總數百分之零點一，但竟然獲發分配百分之五嘅選委席位，離唔離譜啲呀？漁農業之政治影響力，與其經濟實力毫不相稱， 0.1%工作人口擁有 5%選委會議席，進出口/批發/零售業佔 22.7%工作人口，只擁有 3%選委，真係得啖笑！而究其原因，漁農界選委最易受中聯辦指揮吖嗎，好彩到咗 2017年，特首可以普選啫，今屆要依既定遊戲規則辦事，漁農界有 57名選委挺梁，咁就無可奈何。
（左丁山）
没有评论:
发表评论