蘋果日報- 收租難進取 - 左丁山

八月十七日本欄講「做工與做人」，內有提及大富人家仔女可以唔使做，自有遺產。

一位富二代雖然生活無憂，有餘暇與同輩（其他自細玩到大之富二代，例如五歲開始就在鄉村俱樂部玩大嘅朋友）商議好唔好埋班去落標競投一批名酒，但佢仍然加入大企業做打工仔，工作好勤力㖭，老闆好賞識佢。此日左丁山與佢飲下午茶，佢話城中有著名風水人物急求套現，賣屋賣樓之餘，依家連私藏一批名酒亦要拎出嚟割價求售，原值千二萬，富二代A話：「我地班朋友仔想話bid六百萬，買番嚟就大家分紅酒，你估得唔得？」好難講咯，或有本港酒莊/投資者出較高價錢搶入，屯積數年等升值呢！富二代A話：「你在專欄講及大富人家仔女唔使做，係講得幾啱嘅。我屋企唔算得大富人家，我亦想自己有一番事業，但確係有幾位朋友被父親禁止涉足職場，全部要返家族公司做董事，每月有白金卡使費，靚車司機供應，但唔准私自在外投資做生意。理由好簡單，一位爸爸話每月家族公司收租收股息加埋有幾千萬，不怕冇收入，只怕賭錢敗家或投資新生意失敗喎！」歷史上總會有收租一族出現，英國工業革命前之鄉紳有田地收租，何須幹活，中國清代民國時期之仕紳亦是如此，香港現在當然有一批old rich，搵長咗幾十年，揸住七元一股嘅滙豐幾百萬股，再加港島幾十個住宅單位、舖位嘅，為數不少，佢地啲子孫確係唔使做，自動放棄新企業新機會。不過亦因為咁，今天之中下層拼搏人士先至有機會成為明日之星。講真吖，香港1950-1970年代，大把人有錢過邢李㷧、黎智英嘅啫，收租世家過得幾代就會相對地落後晒㗎嘞。又有一位讀者曾來電郵講「做工與做人」，竟然叫左丁山到中大開班教通識，真識講笑，中大有咁多鴻儒學者，幾時輪得到左丁山開壇。不過有一件趣事或可供讀者當參考，最近一位中大經濟系畢業生與兩位某大畢業生同時申請一份銀行工，進入最後階段，銀行部門總管作最後面試，三人一齊見，最後一條問題係：「你最近睇過嘅報紙、雜誌係邊份？點解揀佢？」兩位某大學生答「爽報呀，編排好，文章簡單。」中大生答：「經濟學人（The Economist）社論，好有深度。」一星期後中大生收到通知，銀行會請佢一個！為何如此？有「通識」就知道點解。