是緣是債？ - 李碧華
我們在茶餐廳聽得兩個阿伯對話，愈聽愈肉緊。阿伯一把年紀，但仔女不生性，啃老又棄老。新正頭他倆同病相憐。
甲：「年初一二梗唔會拜年，初七先至嚟……」
乙：「我個仔年頭到年尾一時話着草返大陸，一時又匿晌新界──佢係出咗事嘞，先識得搵我，搵親就要錢！」
甲：「咁樣唔搵好過搵啦。」
乙：「要出事至見到面，掛住都冇用，有時都望佢唔掂，返歸求吓我，記得自己有個老豆。」
甲：「唉老豆咪又係㩒機。」
乙：「你個仔識得拜年咪好囉──」
甲：「佢同佢老婆嚟仲買咗包生果。佢話，老母死咗咁耐我又一支公，不如張屋契寫埋佢兩個名，佢又話，會搵個大家信得過嘅律師做見證，保證會孝順我順我意。」
──好想上前提醒老人家：千萬不要加名！千萬不要相信懷有目的才回家探父的衰仔！在這個價值觀扭曲而一間屋無比珍貴的年代，任何人為了謀奪無所不用其極，幾許老人中計得看兒女臉色痛苦度日，甚至換來被驅逐厄運，而為錢為樓弒親的碎屍案，正上港聞版。
我們終於沒有。因為父子血濃於水，是緣是債？旁人難以置喙。
HH
没有评论:
发表评论