港鐵跪低 - 左丁山
港鐵（66）與特區政府就興建高鐵而達成的特別協議，係要召開特別股東大會批准嘅，政府係大股東，不能投票，如果有一啲基金股東不滿，投反對票嘅話，協議就會泡湯。無論政府與港鐵點講都好，無端端要派發特別股息4元4角，以超高息率12.2%引誘小股東，係另類「買票」方式，小股東想要四個四呀，咁吸引，唔該投票贊成。
老友A從港鐵上市第一日起，買入咗一萬股，當時好似係十一二蚊左右，揸到依家，股息唔錯㗎，加埋股價升幅，佢賺得好滿意，買港鐵多年，係好理想投資，所以佢話：「我一定投贊成票，收到四萬四千特別息，去旅行參加豪華團都好啫。」唔怕以後港鐵孭上政治風險，股價會跌咩？老友A話：「唓，你今日用36個幾去買就有風險，我怕乜佢跌呀，跌到25蚊我仍然有賺，我一定投贊成票㗎！」舊股東平價買入，想法同新股東（三十幾蚊買入）係有啲唔同嘅。
用咁嘅方法「賄賂」小股東，是否良好公司管理？里昂發表報告講明，非也。按規矩，召開股東特別大會之前，要由港鐵一班獨立非執行董事組成一個委員會評估協議之正面與負面因素，聽取另一個獨立財務顧問嘅意見，然後向小股東推薦：投贊成票還是反對票。香港地方細，中環係一條財金鄉村，你識我，我識你，既然政府係大股東，大股東心意已經畫晒出腸，大家識做嘞啩？何況獨立非執董之中，不少係現任特區政府嘅人，例如啲官員、議員、前高官之類，你估佢地唔識體會領導苦心？真正獨立嘅非執董大概會問：既然主席錢果豐聲言向港鐵追討並無法律基礎，為何港鐵要負上封頂後超支風險？港鐵自有現金不足，為何要在進入加息周期之時借錢派息？孭咗港鐵條數之後，沙中綫及港島南區綫尚未完工且有拖延，以後如有工程超支，港鐵又要向銀行舉債多少銀両？
11月30日宣佈之協議，顯然並不合乎上市公司港鐵之最佳及長遠利益，承擔封頂風險之後，仲未能清除/排除以後政府追究責任之法律風險（即是我為你孭飛，你還要保留法律追究權利），直情係被大股東逼到跪響度簽城下之盟，唯有出計仔派特別息去冧小股東。唔怪得里昂話此非良好公司管治咯。你睇吓獨立非執董馬時亨主動出擊，向傳媒及議員解釋協議，遊說支持，根本當咗自己已經係港鐵主席，何來獨立可言？佢既然已經公開表明立場，港鐵就唔應該將佢放在上述「獨立非執董委員會」內，以示叫做尊重小股東及公司管治。
Z88
没有评论:
发表评论