中資買地 - 左丁山
蘋果訪問金牌內房股分析師Oscar Choi（蔡金強，花旗銀行），蔡金強話兩年內內房公司會搶走七成香港投標地皮，呢樣左丁山信呀，如蔡金強話齋，香港地產商普遍進入老年期，主要揸弗人都在60歲、70歲以上，已經上晒岸，自然性格趨向保守，打穩陣波。依家的內房人士好多都係白手興家（當然有晒政治關係），話事人年紀在50歲上下，正如40年前嘅李嘉誠、李兆基、鄭裕彤、郭得勝等人，一味要向前衝，咪一樣將當年嘅最大嘅地產公司香港置地嚇窒咗，太古集團連尖沙嘴海傍都賣埋俾新世界，於是新世界可以大躍進，漸漸變成英資退，港資上嘅局面。
事至今日，內地市場大到無倫，內房公司每年銷售額數以千億元為單位，香港地產班霸仍然講緊二百三百億，數字相差太大嘞，故此內房股進軍香港，係好自然一回事，中資進，港資退，無非係重演1980-1997嘅一個循環而已。
香港市民其實無須驚怕中資搶地，如佛利民在80年代講過，美國土地係搬唔走嘅，日本人要買起加州、夏威夷，請自便。結果係點？係美國人以高價賣出，日本經濟泡沫爆破後，日本公司／富豪在美國所買嘅土地、大樓、高爾夫球場皆蝕讓，著名嘅曼赫頓洛克菲勒中心由高盛組織投資基金以五折價向日本財團買回。今天輪到中資去紐約買大樓、買酒店、買地皮嘞，成日講美國優先嘅特朗普並不反對，佢嘅女婿古斯納仲想與安邦拍檔合資，分一杯羹㖭。
中資內房公司之高債高槓桿策略，全靠牛市支持，一旦有意外事情發生，抵押品受質疑，高槓桿就足以害死公司。中國GDP現在全靠高債務支撐，一啲外國分析師唔睇好。中國就一味相信可以用官方政策調控，此或是周小川過晒內地高幹退休年齡（69歲）而仍然擔任中國人民銀行行長嘅理由，佢在2002年12月28日上任，已做咗接近15年，新任中國銀監會主席郭樹清或者一兩年後有機會接替佢。目前中國股市因有所謂「從嚴監管」，釀成從嚴監控風暴，令A股大跌，顯然係一啲內地上市公司及投資者心虛，恐怕受調查之故。內房股難道會比其他公司更清白，你諗你。4月24日，年來出手豪爽不停收購海外資產嘅海航，旗下上市公司海航實業（0521）下跌逾15%，自4月10日以來，跌咗32%，警告訊號出現了！
I
没有评论:
发表评论