【加州直擊】Tesla廠睇Model 3真身　車頭好似無嘴咁

相信好多已落訂的車主都想問，Model 3幾時有車？Tesla CEO Elon Musk（馬斯克）於上星期首批Model 3交車直播時，都自嘲被人於社交平台不禮貌追車，直言這一刻面對最大的困難就是未來半年，如何將生產量推高至每周5,000部。香港就肯定有排都未有，預計2018年中至尾先有機會交車，落了訂的車主之前都是估估吓，或者看一些虛擬畫面，現在終於有機會實在少少睇睇真車。

Tesla加州車廠門外泊了一部Model 3及Model S，車主可以慢慢比較。

Tesla位於加州費利蒙（Fremont）的車廠，門外充電泊位就泊了一部正在充電的Model 3，還要開了一隻車窗任睇，而旁邊車位則泊了一部Model S，可以慢慢比較。Model 3雖然只是入門級電車，但望落去身形一點也不遜，數據上只是比Model S窄些少，車尾線條設計型格利落。車頭造型同Model S完全唔同，睇你能否接受佢好似無嘴咁。最後比較兩車內櫳，雖然屏幕縮細至15吋，但內櫳同樣充滿超簡潔科幻味，反而覺得Model S屏幕大得有點浮誇。3.5萬美金起錶，來港後應該30萬港元有找，電量續航力有355公里，有如此配搭同設計，呢個套餐又真係幾吸引嘅。