月餅創意 - 左丁山
今年吃月餅，吃到不亦樂乎，於是又引起老友批評：「你因住呀，食咁多豬油、蛋黃，好唔健康。」每年臨近中秋，都俾家人朋友出於善意、批評一次，但幾十年習慣係咁，點改呀。用番現代心理學概念，左丁山鍾意食月餅，或有可能係出於童年陰影，因為嗰陣時冇得食。
想當年，阿媽每個月供月餅會，每月供款三元，係一間茶餐廳嘅月餅，叫做「妙佳」，位於亞皆老街，現今先達廣場對面。供足一年共36元，每年農曆七月尾就可到「妙佳」攞月餅，純蓮蓉、蛋黃蓮蓉，雙黃蓮蓉，果子五仁再加棋子餅，好似總共係十盒，唔記得清楚咯，但唔係全部食晒嘅噃，阿媽要留番一半，中秋過後帶返鄉下俾阿嫲同兩位家姐食。嗰陣時旺角最巴閉嘅就係龍鳳茶樓與瓊華酒樓月餅，點解唔去供呢兩間名店嘅月餅會而係去供茶餐廳呢？一字咁淺啦，龍鳳瓊華係貴好多嘅嘛，邊度食得起。
幾十年後，全香港都有錢，月餅只嫌過多，不嫌少，36元買唔到一個月餅，且愈貴愈好賣。左丁山或者係堅離地，以往收到一啲美心月餅券，隨手就送咗俾看更或信差或清潔阿嬸，今年聽到美心月餅暢銷，人人撲美心月餅，於是好奇之下，想話去買一盒試吓有乜猛料驚喜，但到處話賣晒，真係愕然又愕然。
今年又特別流行奶黃月餅，沙田陳太告知，佢兩個孫女係咁食奶黃，其他一概不吃，令到佢要頒下禁制令。老人家就未必鍾意奶黃呢類「假月餅」，都係傳統嘅家常蛋黃蓮蓉（奇華黃蓮蓉，唔係白蓮蓉）與及蔡瀾抱抱月餅火腿松仁月最啱口味，其他花款只係貪吓新款而已。Haagen-Dazs，agnes b.亦有所謂月餅出售，其實就係變相雪糕與朱古力，新一代公關送禮就喜歡送呢類月餅喎，夠潮啩。但一啲新人類設計師，就潮得滯，為創新而創新，設計嘅圖像令人一見就嗌大吉利是，例如機管局商場嘅宣傳用藍色為底色，月餅為主打，背景配上藍白灰色燈籠，標語就係：「分享心意，『佳折』更實在」，係絕對失敗之作。中秋佳節用藍白燈籠？玩食字喎，「佳節」變「佳折」，死火啦，折有「折斷、喪失、夭折、抵銷」之意，都係不吉之詞，過中秋最緊要講人月兩團圓，折甚麼呀，設計師唔識中文嘅咩！一位世姪話左丁山老套，不能接受新一代嘅創意。唉，創意需要有cultural context，不能太過脫離本土文化呀。
没有评论:
发表评论