國足國恥 - 20130622 - 蘋果日報

 

國足國恥

美國前副總統切尼大概老到懵咗，指史諾登逃往香港，可能係中國間諜嚟嘅，佢話中國係一個無自由嘅國家，史諾登居然老早去過中國，又學中文，十分可疑喎。
如果美國年青人去吓中國旅遊，學中文，就會變成中國潛伏在美國嘅間諜，中國咪魅力驚人，對美國青年有無比吸引力？真係搵鬼信。美國一代歷史大師耶魯大學著名教授史景遷精研中國歷史，著作無數，夠係精通中文啦，佢會成為中國間諜咩，唔怪得切尼年青時雖然入咗耶魯，但要在其他大學畢業。最近美國黑石（Blackstone）公司創辦人Stephen Schwarzman捐出三億美元設立一個留本獎學金基金，資助美國及全世界學生到中國留學，希望此基金有一日可以與牛津嘅「羅得學人」（Rhodes Scholar）齊名，此計劃與北京清華大學合作，每年全費資助200名學生攻讀一年制碩士課程，主修工程，國際關係，工商/經濟，公共政策等等，200名學生之中，預定45%來自美國，20%來自中國，35%來自其他地區。若以切尼嘅見解，美國大富豪係唔係為中國培養潛伏美國嘅間諜呀？
切尼思想狹窄，在美國亂噏，可以不理，不過中國出現國恥，就不能不提。據說習近平鍾意睇足球，有一個中國夢，就係夢想世界盃在中國舉行，中國隊有資格爭標。以今日中國國勢，國際足協向錢看、向政治看嘅作風，在中國辦世界盃，夢想可以實現，但中國足球隊咁水皮，咁羞家，點踢世界盃呀？中國國家隊輸俾日本南韓澳洲，理所當然，對住伊朗，沙特阿拉伯隊難言取勝，亦係好平常，總之要衝出亞洲，已難乎其難。但上星期以一比五大敗俾泰國，內地傳媒質疑係打假波，故意輸多啲，以羞辱西班牙籍教練金馬曹，就真係令習近平嘅60歲生日都過得氣憤難平。唔鍾意賠錢送走金馬曹，已欠風度及合約精神，仲要打假波，在澳門賺番一筆？中國足協管理層及全體球員實在無廉恥到極，美國留學生在中國見到如此情況，仲會為中國做間諜？笑死就有份！習近平如果真係有個中國夢，清洗咗中國足協先啦！

左丁山

國足國恥 - 20130622 - 蘋果日報

蘋果日報 - 20110322 - 香港身份證

 

香港身份證

2011年03月22日

法國 T自巴黎回港一行探媽媽，搵左丁山到陸羽飲茶，話題當然離不了日本大災難，佢話法國電視台訪問巴黎日本人，問及為何日本社會沒有大混亂。日本代表答，日本人首先想到嘅唔係個人，而係社區、社會，向社區負責，不能令家庭及社區丟面，一定要遵守規律及秩序。呢啲事，西方人及非日本亞洲人通常做唔到，巴黎就屢屢發生過學生/青年人示威演變成搶掠街鋪嘅事件啦！
法國 T原來有一個男孫在東京出世嘅，但日本嚴格限制外國人移民入籍，所以外人在日本出生唔會攞到日本居住權，與法國境內到處是非洲人移民嘅環境，大大不同。日本少外人，族群統一，團結較易，但此優點同樣是缺點，就係文化一元，缺乏活力。法國夠文化多元嘞，但容易引發族群互鬥。法國 T話：「我地移民法國多年，入咗法國籍，但法國失業率長期維持在 10%左右，年青人失業率更高，搵工不易，我好想第三代在香港出生，攞香港身份證，大個咗可以選擇在歐洲或者返香港搵工，有香港身份證，到中國打工亦容易好多。點知新抱與兒子返嚟香港待產之時，還未到產期，到日本旅行之時，竟然遇上早產，緊急在東京醫院生仔，於是孫兒攞唔到香港身份證，真係人算不如天算！」
果然係謀事在人，成事在天，但經佢一講起，就知道西方經濟前景麻麻，好多時會講及 Young Men, Go East!尤其是香港移民，好想兒孫攞番張香港身份證。最近有兩位美國八十後來港搵工，一位在哥倫比亞畢業，做過 Fulbright Fellow，係要成績優越先至可以得到呢個榮譽嘅，佢仲識講流利普通話㖭，可惜冇香港身份證，搵工有難度。另一位係美國出生華人， UC畢業後到過日本留學，大地震之前兩個星期離開東京來港搵工，但又係冇香港身份證，呢兩位年青才俊恐怕要失望地回歸美國。見到佢兩位，就明白法國 T點解要咁深謀遠慮。各位移民去咗外國嘅朋友不妨諗吓，如果有細路曾經住在香港七年嘅，記得收起所有在港讀書紀錄，健康院檢查紀錄，以作七年居住證明，等佢地返香港申領香港身份證呀！

• （左丁山）

蘋果日報 - 20110322 - 香港身份證

蘋果日報 - 20110128 - 何鴻燊引爆大新聞

 

何鴻燊引爆大新聞

2011年01月28日

何鴻燊之資產分配，於一月二十五日成為全港中文報紙大新聞，中文評論員仲寫埋解讀、解構，讚何鴻燊好嘢 㖭。哎吔，死咯，素來報導本地新聞比較慢半拍嘅「南華早報」，竟於同日爆出猛料，成為全港獨家，中文報紙枉有咁多記者，竟然輸咗幾條街。
「南早」點解突然咁巴閉，無他者，碰啱何鴻燊之律師樓 OLN，幾乎係全洋班，資深合夥人高國峻並非本地人，而係 Gordon Oldham，呢位洋人只識向英文報紙放料，話俾「南早」聽，何鴻燊對澳娛之股權轉讓，事前並不知情。高國峻擲下呢粒新聞原子彈，令到澳博股票在當日十點前本已有按盤價，要立即停牌，亦令中文報紙震動，即刻趕派記者追蹤三太、四太、何超瓊、何超鳳等人，一位大編輯朝早還未瞓醒，已收到電話通知：立即追新聞呀。
香港富豪家族之家產分配，要鬧出官司，以往多數係家族成員爭產，但陳廷驊仍在生，太太與女兒已經上法庭。何鴻燊仍然在世，有可能與二太三太及女兒等打官司，認真匪夷所思，諗起嚟，陳廷驊只有一位太太，兩個女兒，好似簡單到極，官司仍然難免，而何生有四位太太，十七位兒女（其中一位已故），形勢極為複雜，為何生資產之分配而有不同意見，又有乜出奇？
投資 C有身家十幾億以上，雖不是大富豪級數，而且正在精壯之年，睇見何鴻燊嘅資產分配新聞，不禁若有所思，問左丁山點睇？哈，學吓左丁山啦，明知自己銀両有限，已經講明唔會有錢分俾仔女，叫佢哋食自己，投資 C話：「唔得噃，個個都知我有啲銀，要分家產嘅。」呢啲事不理，不知為妙，叫佢去搵銀行成立一個家族信託，等啲專家教吓路先至講，但投資 C又話：「信託又點呢，郭家夠有信託基金，三兄弟仍然有意見噃！」唉，這正是有錢人的煩惱，左丁山冇資格講。香港有咁多富豪，提供大把商機俾律師與銀行信託部，唔怪得一啲大律師發到嘭嘭聲。

• （左丁山）

蘋果日報 - 20110128 - 何鴻燊引爆大新聞

蘋果日報 - 20110106 - 雞蛋紅酒白飯

 

雞蛋紅酒白飯

2011年01月06日

南韓竟然傳出有 H5N1病毒，政府立即下令撲殺禽畜十萬頭以上，對南韓農民係一個大打擊，韓農上街維護自己權益，素來勇悍，韓美自由貿易協定搞足幾年先至可以簽字，韓農反對係其中一個大因素，但面對禽流感，韓農都冇符啦，唔通唔俾政府殺禽咩，睇吓賠償條件如何嘅啫。

其實日本亦發生小規模禽流感，日本已禁止雞產品出口，包括雞蛋在內，點解知道呢，靚女 S上星期上午在銅鑼灣行街，行行吓經過日本拉 麪店 MIST，佢嘅男朋友話：「咦即係嗰間米芝蓮一星餐廳喎，入去試吓先。」靚女 S鍾意食拉 麪加生熟蛋，點知夥計話賣晒嘞，冇供應。雞蛋都會賣晒嘅？有冇咁巴閉呀，唔入貨啫啩！後來得到答案， MIST只賣日本雞蛋，日本唔出貨，佢哋就唔會用中國蛋、美國蛋代替，總之係要跟足日本方面規定嘅供應行事，此乃 MIST嘅生意原則喎。

冇日本蛋就唔賣，冇日本米又如何？日本米應該有大量供應嘅，唔駛驚，事實上，日本米太貴，而日本人嘅收入增幅太輕微，甚至倒退，遲早食唔起日本米，日本米遲早要找尋外國市場，好似法國波爾多紅酒嘅。一級靚紅酒，法國人點飲得起呀，出口到亞洲先至搵到錢。最近外電報導，西班牙人過聖誕，超市貨架上冇乜十至十五歐羅一枝嘅紅酒，因為價錢貴，冇乜市民買，唉吔吔，十五歐元一枝紅酒，在上海可能係用嚟燴牛尾啫啩！唔怪得華爾街日報一位作家在聖誕前寫及：「在紐約酒店飲紅酒，一啲貴酒冇人要，大家都話： let the Asians buy them（等啲亞洲人買啦！）」言下之意，其實係嘲笑亞洲人唔識貨，唔識價。

日本米呢？近日有啲頂級靚米來港，聽講話要八十九元一公斤，有專家計過，大約等於每碗白飯九蚊，貴泰國香米幾倍！一位老友喺一月一日到港島大學道港大校長府參加信興集團新年派對，中午時份最搶手嘅食品你估係乜？老友話除咗日本刺身之外，就係日本米飯加蒙氏 o架喱，呢日信興特別以上述高檔日本米用 Panasonic高檔電飯煲（約近三千蚊一個）煮飯，效果令人驚喜，白飯居然供不應求。以後高級人士在家請吃飯，請留意嘞！

• （左丁山）

蘋果日報 - 20110106 - 雞蛋紅酒白飯