有別一般死氣沉沉的舊區，深水埗是佳餚美食的卧虎藏龍之地，在這個庶民美食天堂，有四個老闆自封為「四大天王」。一年前他們成立銀會，每月兩次聚首一堂，喝酒聊天，言語間互相吹捧或搶白。他們雖然各有所長，各據地盤，但卻難得地投緣，沒有同行如敵國，有的只是相識多年的兄弟情。
記者：何嘉茵
攝影：黃子偉、陳永威、陳國良
深水埗飲食界「四大天王」，有做過御廚的「容記小菜王」容哥、大牌檔老字號「愛文生」老表、以新派小炒作招徠的「萬發海鮮火鍋菜館」大哥明及賣雞煲賣到街知巷聞的「大煲皇煮廚」大煲強。
容哥肉緊地說：「『四大天王』個朵，係我起呀！我哋個個都牙擦擦，深水埗冇人唔識。」大煲強苦笑道：「我唔敢叫自己四大天王，驚被人笑到面黃，都係叫『四大癲王』算啦。容哥，講癲，你係第一大癲，哈哈……」這天，他們正舉行月頭的銀會飯局，飯局剛開始，他們已喝得臉紅耳赤，氣氛熱鬧，容哥用「兄弟」二字形容四人之間的感情：「我哋每個月逢1號同16號夜晚都會聚埋，研究生意經，我哋廚房佬出身，粗人一名不過夠勤力，到𠵱家仲落手落腳做，夾到呢！大家係兄弟，就算開對面舖打對台都唔會有心病。」
大煲強又道：「老表嘅鹹豬手最巴閉，每日最差都賣到過百隻，整得咁好味，抵你好生意嘅。容哥燒肉都好嘢，層皮燒到夠鬆化，搞到我唔敢跟住做。」容哥接着說：「我容哥發明焗爐燒肉，全港有邊個唔知，但都唔夠萬發厲害，喺廚房碌乳豬，門口日日排晒隊，即叫即做，要等成粒鐘先有得食，陰功到呢……肚餓千祈咪幫襯。」老表倒附和說：「萬發係沙漠種花，開喺爛舖位都咁好生意，大煲皇嘅雞煲、點心都好厲害，兩兄弟叮噹馬頭，開完一間又一間。」大煲強故作認真說：「老表，我好佩服你由細細個牌檔仔做到入舖，你𠵱家有幾多間舖我唔知，剩係喺深水埗你都有三條街，我估你身家未夠十億，都有八億八。」老表連忙耍手擰頭：「邊有三條街咁多，最多都係得兩條，唔好再講，我怕被人打劫呀。」席間，一碟薯仔牛柳粒引起整個飯局的高潮。「薯仔牛柳粒係我十幾年前研究出嚟，一推出唔知幾受歡迎，搞到其他餐廳有樣學樣，𠵱家成個深水埗有做小炒嘅都賣緊。容哥，你好似都有賣呀！」大哥明說。「我嗰碟你邊有得同我比，我用嘅係日本薯仔、新西蘭牛柳粒，係高質素之作，一分錢一分貨，你賣$78，大件夾抵食，我由$68賣到𠵱家$158，唔抵得我大把人幫襯！」
