印度的人才 - 左丁山
美國總統奧巴馬近日訪問印度，選擇的日子不遲不早，剛巧碰上印度的國慶日，於是受邀與印度總統總理一同參加閱兵典禮，美印雙方趁機互相拉攏對方，鞏固外交關係，呢啲動作，北京自然睇到。中國與俄羅斯交往空前頻繁，習近平與普京似乎交情深切，大有中俄聯手抗美之勢，於是乎印度莫迪與奧巴馬來一個擁抱，一於美印聯手制中。中國有13億人，印度有12億，而印度無一孩政策，人口增長率高於中國，人口平均年齡遠低於中國，當中國人口老化之時，印度還是朝氣勃勃，故此亞洲的一場龍象大比拼，在未來五十年，還不知誰勝誰負。
以國際人才而論，印度目前肯定領先。昨日講過在印度國慶會，左丁山就碰到不少中環金融界高層，充份顯示印度人在國際金融界的影響力。叉開一提，呢晚見到著名印度記者/傳媒人褚簡寧，佢到處搵酒飲，左丁山對佢講：「只有Perrier與橙汁。」佢唔信，周圍搵，就係冇呢，找侍應一問，先知道主人家要辦一個無酒精茶會，褚老兄話不明所以：「我地印度都係一個產酒大國嚟嘅噃！」
次日有一位世姪請飲茶，佢在大型投資銀行工作，承認印度人勢力日益壯大，與歐美人士幾乎並駕齊驅，中國大陸人與香港人加埋起來都唔夠印度人喺投行競爭，而且內地人在美資投行主要係憑「關係」，擔任中國區高職，做其他跨區職位咯喎，以印度人較多。問世姪此其中有何原因？佢話：「講教育，大家都係名校出身，讀MBA來來去去都係哈佛、MIT、華頓、哥倫比亞、芝加哥、史丹福等等，但印度人英文無論講寫，始終好過我地，佢地嘅說話能力真係勝一籌，仲有一樣，係一個印度同事飲完兩杯威士忌同我講嘅，佢話印度人互相扶持，一人得道，同鄉同學一齊上，反之在佢眼中，中國大陸人與香港人格格不入，大陸人又鍾意內鬥，互相篤背脊，分派系，一盤散沙喎。我自己係香港人，在公司內更加係單打獨鬥啦！」咁講法，印度人在國際公司地位上升，有深層道理。未正式成立嘅「金融發展局」話香港金融人才唔夠，全面缺乏，主要係講真正「做嘢」嘅人唔夠，講到「領導人才」，恐怕更加艱難，不知人在何方。
HH
