流動床上用品 | 蘋果日報 | 果籽 | 名采 | 20150624

http://hk.apple.nextmedia.com/supplement/columnist/%E9%82%81%E5%85%8B/art/20150624/19195298

流動床上用品

失婚失戀之後出書數臭前度這種原始報復行為，二十一世紀仍然有市場嗎？有的，如果閣下知名度很高，如果狠心把你扔進屎渠的衰佬是明星名流，如果橫刀奪愛的小三小四個個冰冰冰冰擲地有聲，並且附上大批從未曝光的提神養眼艷照。不過假若任何一環斤両不足，我勸你還是多一事不如少一事，不要搞搞震吧，網絡時代按一按電腦無奇不有，誰有興趣知道聞所未聞的歐洲外交官喜歡從事什麼床上活動？而且，享受舔肛是人之常情呀，君不見周圍準備隨時提供服務的舌頭多麼踴躍，可見被舔之而後快的受眾絕非少數，生產艾慕杜華的國家派到中國來的大使先生好呢味，一點也不值得大驚小怪。近日過氣男星漢密保加在法國出版自傳，維斯康堤長維斯康堤短喋喋不休，連「情敵」阿倫狄龍也擺上枱，亦未見引起圍觀哩，資深影迷翻了翻，詫異說了一句「咦，怎麼沒收裸照」就揚長而去，黃昏的諸神尚且獲得冷肩膀，等而下之的凡夫俗子更加無人問津。
亥絲蜜芙《仇女小故事》有一則《流動床上用品》，主角苗蒂烈是個撈女，好食懶飛販賣青春，廿二三歲已經開到荼蘼，不得不另謀出路：「她手頭有幾個昔日男友的地址，可以通知他們，恐嚇說打算把他們寫進回憶錄，表示有出版社邀請她執筆。但苗蒂烈和那些曾經以回憶錄作威脅的女子談過，年齡超過二十五而下半生沒着落的，其中只有一人成功。她們說，通常獲得的是對方的訕笑，『你快寫呀』，而不是金錢。」她最後遭壞男人綑綁成木乃伊投進荷蘭運河，「像用到殘的打火機一樣被丟掉了」，問你驚唔驚？

聽慣老闆話｜HK Appledaily Supplement

http://hk.apple.supplement.nextmedia.com/columnist/20150625/21579529

聽慣老闆話

2017政改方案爭論到最後，建制派戰略錯誤，鹵莽行事，製造一場空前絕後嘅政治大笑話，讓政改方案在歷史紀錄中，成為28對8嘅大敗議案，實在令所有人意想不到。田北俊俾北京搣柴之後，呢次唔跟葉國謙、林健鋒等隊離開，「忠貞報國」，率領自由黨議員一齊投下贊成一票，唔知會唔會再受北京重用呢？葉劉墮馬，田少呢位「人民武士」可以取而代之，去選特首啦！

建制派自亂陣腳，無故大敗，形同自殺，當然係醜過豬八戒，等香港人笑一世。兩位年逾花甲嘅老波骨議員葉劉淑儀與林健鋒竟然公開泣不成聲，恐怕唔會有人同情，田少在fb講「人蠢無藥醫」，都唔知係針對邊個，但葉劉經此一役，其特首野心肯定大打折扣，乜唔係啫，以後北京點敢相信葉劉識得玩政治呀，故此一位律師講：「葉劉係唔係為自己特首之夢破碎而哭？林健鋒是否為了俾田少影射而哭？」點鬼知啫，呢兩位行政會議成員或者因為壓力而哭呢？壓力來自何方？見到經民聯成員梁君彥在六月十八日下午三時半乘車直奔中聯辦，略知一二啦，乜佢地唔係向所屬功能組別選民解釋嘅咩？哦，原來真正老闆就是在西環辦公嘅，平時唔認，呢趟不打自招。

左丁山有兩位退休賓架老友睇到投票結果，一位狂笑，一位大哭，反應完全相反，狂笑嗰位素來反對831方案，大哭嗰位就力主袋住先，今次大哭並非為了政改不成而哭，佢老早知道唔夠三分二多數票，投票前已打定輸數，但在電視機前眼見自己啲同路人（建制派議員）弄出一套荒唐鬧劇，就真正悲從中來，覺得議會內出醜的同路人真係扶不起的阿斗。為何建制派議員硬係俾人一個觀感、形象：佢地嘅知識質素係低一啲？唉，一個人不論讀書多少，歷練如何，只要佢甘心聽從上頭吩咐，聽命令行事，自動放棄思考能力，行為就會變成咁，好似一位潘兆平議員坐在議事堂上，見同路人離場，竟然不知所措，唔敢投票，唔通佢為人笨成咁？唔係啩，應該係在那一刻，佢收唔到指示，唔知點算好啫，聽慣命令之人往往在緊張關頭就會咁。點解美國咁多科技創新，領導全球呢？當然與美國人唔慣聽總統命令，富獨立思考有關，人民太聽話太馴服嘅國家，幾難持續維持科技創新力，砌贏美國。

mcwriter@appledaily.com

左丁山昔日文章