雜誌掀爭奪《忽周》讀者戰 《壹週》《東周》《東地》吸客
【本報訊】創刊廿載的《忽然1周》停刊，除掀起「終結號」搶購熱，更激起讀者爭奪戰。重組後的《壹週刊》與《飲食男女》及《Me》合併出版，以全新組合面世；《東周刊》昨在便利店張貼告示，憑《忽周》封面免費換娛樂冊；《東方新地》即時重組內容，合併本加入《新假期——飲食》，四合一搶客。但資深傳媒人查小欣指「搶客唔易，搶廣告更難；如果咁好賺，肥佬黎肯定唔會唔做！」
記者：呂麗嬋
■《東周刊》昨率先出招吸客，在便利店張貼告示，憑《忽周》終結號封面可免費換領娛樂冊單行本。謝榮耀攝
《忽周》停刊，一書兩冊的《東周刊》即時「做嘢」，要求印刷廠加碼印書。據知，兩萬本「準忽周替代品」已陸續運抵各區便利店，憑《忽周》終結號封面，可免費換領「娛樂冊」。該雜誌副社長黃庭桄直言，《忽周》擁有龐大讀者群，一旦離場，潛力無限，「好多讀者都有閱讀慣性，定時定候習慣買某本雜誌，今次憑封面免費試睇，係希望可以拋磚引玉，吸納咗呢班讀者」。
以娛樂新聞作招徠的《東方新地》，更將出版日期由逢周日改為周四，緊貼《忽周》出街時間，還即時拼合同集團旗下《新假期——飲食》單行本，跟足《忽周》娛樂飲食美容的黃金組合吸客。該雜誌社長曹雪聰稱，自《忽周》宣佈停刊，已即時變陣搶奪市場。「今時今日經營雜誌一啲都唔容易，市場上突然多咗幾萬讀者，邊個唔想搶呢班目標讀者吖？」
《am730》《都市》擬加入
對於停刊掀起搶奪戰，《忽然1周》合併本行政總裁趙偉堅苦笑謂很諷刺，「正當話香港冇娛樂圈，原來又有咁多人想去搶！」諷刺的，除了是搶讀者，剛投入失業大軍的娛樂記者原來也是爭奪目標。據知，免費報章《am730》及《都市日報》均有意吸納《忽周》員工，大搞娛樂新聞。《am730》副社長馮振超表示，該報正積極了解新市場，而開設全新娛樂新聞專頁正是考慮的其中一個方向。
馮振超說：「咁多人對《忽周》有興趣，證明呢本雜誌仍然有市場價值，其實黎先生應重新考慮係咪要摺咗佢。」《都巿日報》主席黃浩則謂，將於下月底推出3合1娛樂雜誌，預算可吸納七成《忽周》班底，連日進行面試。黃口中「包羅萬有」的新雜誌，能否在逆市中應市，或需拭目以待。至於《壹週刊》將與《飲食男女》及《Me》合併出版，以全新組合迎戰。
報販及讀者心聲
報販杜小姐：
「成個報紙檔最好賣係《忽周》，知道要執我都好驚訝。」
市民陳先生：
「娛樂雜誌、報紙都少買，上網或者手機都有得睇啦！」
上一則: 葵盛泳池狂噴黑污水
下一則: 報販：《忽周》停刊影響生意
