羅蘭首踏紅館玩甩Beat 胡楓開騷唔夠喉 晒命嘉賓多
86歲高齡的胡楓（修哥）前晚踏紅館開騷創紀錄，83歲羅蘭做嘉賓將第一次獻給老友修哥，首踏紅館玩甩beat演繹《天各一方》，還有契仔契女好友共12位群星拱照，令開騷前曾失聲的修哥可以減輕負擔，更晒命嘉賓多嫌唱得唔夠喉：「請咗咁多嘉賓，搞到我冇得唱！」
86歲修哥前晚踏紅館開騷，六個孫上台齊撐，兩名曾孫更獻花，令修哥暖在心裏。
粵語片年代出道做小生的胡楓，縱橫影視圈65年，拍過375部電影、84部電視劇、開過3次紅館騷，上月踏入86歲的他，第四度踏紅館舉行一連兩場「86破晒紀錄」演唱會，前晚首場騷獲張家輝、譚詠麟、盧海鵬、陳欣健、森森、斑斑、劉美君、Joe Junior、安德尊、周啟生群星撐場，契仔張學友更越洋唱歌，老拍檔羅蘭就送上自己的第一次，為修哥騷首踏紅館開金口，怎知卻甩beat被鬼馬的修哥取笑，全場笑爆嘴。
羅蘭姐將第一次獻給修哥，演繹《天各一方》讀獨白時慢時快被修哥取笑。
姊妹花森森（左）和斑斑（右）再踏舞台載歌載舞。
修哥和阿倫（右）鬥跳十字舞步，兩人都寶刀未老。
窒阿倫等錢使
當羅蘭姐出場跟修哥演繹《天各一方》，負責獨白的她以「聾婆」腔講得又慢又詭異，修哥笑問：「你講完未呀？你呢句對白慢到音樂都過晒啦阿姐，咁我點唱呀？」羅蘭姐氣定神閒說：「嫌我講得慢呀，咁你唱唔唱呀？」修哥乖乖答：「咁我唱，冇辦法唔唱啦。」到羅蘭姐講第二段獨白時，修哥又說：「喂！你好快喎，音樂都未完。」羅蘭姐即鬧修哥搞氣氛：「快又話快、慢又話慢。」跟着羅蘭姐獨唱《漫步人生路》，指自己的第一次給了修哥：「第一次喺紅館唱歌。」
67歲的譚詠麟以後輩身份做嘉賓，修哥說：「冇諗到樂壇至尊可以做我嘉賓。」阿倫說：「其實我哋喺《江湖悲劇》合作過，我仲被你扑過，我都希望你可以完成我嘅心願，下次開《四個小生去旅行》可唔可以預埋我？今日喺度睇到我唱歌可以唱到80後，到時唔知仲跳唔跳到舞。」修哥笑說：「乜你開演唱會有跳過舞咩？」之後兩人就表演跳十字步，修哥又指阿倫在紅館開好多演唱會，阿倫就得戚指大家識貨，修哥再取笑：「佢哋識貨，但你等錢使。」
前晚契仔學友越洋唱《還是覺得你最好》力撐，身在橫店拍戲的契仔黎明拍片祝賀：「Happy birthday！契爺，86歲啦，今晚你喺紅館開騷，肯定是前無古人，不過冇我份，後無來者，因為我要開工，台下嘅觀眾玩得開心啲，anyway，good luck！」契女劉美君就現身支持合唱《一對舊皮鞋》，修哥的六位乖孫和兩位曾孫更上台向他獻花，場面溫馨。
契女劉美君現身唱《一對舊皮鞋》，身體力行支持契爺。
前晚身在新加坡開騷的學友，越洋為契爺做嘉賓，令修哥十分驚喜。
在橫店拍戲的契仔黎明，拍片補祝契爺生日快樂。
「搞到我冇得唱」
完騷後修哥接受訪問說：「開咁多次演唱會，以前冇咁索氣，今晚索咗兩次。86歲都係好難得嘅年齡，我都好開心。」對於學友指破修哥紀錄要再等30年，修哥說：「每次請學友嚟演唱會佢都唔喺香港，今次我冇搵佢，畀人推三次個心都唔安樂，都唔知邊個搞啲咁嘅嘢，好感動。」
問到修哥是否刪減曲目？他笑言：「真係cut咗好多歌，何麗全囉，請咗咁多嘉賓，搞到我冇得唱，第日唔好請咁多嘉賓。」問到是否唔夠喉？修哥說：「其實喺十日前失聲好擔心，醫生話我操勞過度，唔夠休息，嚇到我呢。今日都唔係完整狀態，有少少瑕疵，唱到最尾有少少咳。」
採訪：卓寶花
攝影：陳慧安
《南方周末》曾引起高度关注（图源：Reuters）