封面故事
689無腦敗家 胡應湘：香港等死
上市公司合和實業（ 65）主席胡應湘，四代在香港紮根。
他六十年代已經營地產，發跡比李嘉誠更早，是首位港商睇準大陸改革開放，最早殺入國內的投資者。
他見證着香港經濟的起落，政治的風浪，對香港有着一份濃厚的感情。
面對同行李嘉誠撤資、香港政經不穩、施政進退失據，胡應湘按捺不住，本週一向本刊透露己見，分析時弊。
他認為香港的成功，是有賴殖民地時期建立起的香港四大基石：房屋、醫療、教育及法治，其中房屋政策已被摧毀。
他又對梁振英政府的「無能」大感憤怒：「僵化！多爭吵又無好政策，變成二流政府，整整吓變埋三流！」
胡應湘今年已七十七歲，坦認「時不我與」；說到香港前景，他再動氣說：「香港等死。」
- 689無腦敗家 胡應湘：香港等死
○○年，誠哥（右）透過李嘉誠基金會向理工大學捐贈一億，當時更親自將支票交給校董胡應湘（左），當時兩人未有牙齒印，相視而笑。（《蘋果日報》圖片）
週一下午，記者走進合和中心頂樓、胡應湘的辦公室，耳邊傳來古典音樂，眼見地上、抽屜，放滿地圖。唸土木工程出身的胡應湘，最愛「按圖索驥」，談到激動處，即攤開地圖，東指西指。他又對香港、美國及中國的歷史背景，瑯瑯上口。穿着簡樸恤衫的胡應湘，在玻璃窗外的維港景色下，將心中積聚的怒火爆發。
鬧房屋政策：幫唔到窮人
信奉自由經濟的胡應湘，對房屋政策鬧得最狠，尤其香港政府竟無地起公屋。四叔李兆基捐地，更是滑稽，「係呢個世界最滑稽嘅事。香港政府有一千一百萬平方公里土地，係大業主，竟然人哋（四叔）揸啲啲就話捐俾你。你自己諗吓，呢個邏輯啱唔啱先，上邏輯堂肯定肥佬啦！」前天文台台長林超英反對開發郊野公園建公屋，他亦攤開地圖，圈住淡水湖罵：「佢話開發公園大家要飲海水，根本係危言聳聽，香港人從來唔使飲海水。我哋阿爺第一代有薄扶林水塘，又係郊野公園，林超英又話唔得啦。咁蠢嘅？點做天文台長。一個人愚蠢無藥醫呢！」
胡應湘愛聽古典音樂，又喜鑽研歷史，這個栩栩如生的模型，正是他的寫照。（陳浩樂攝）
胡應湘為人心直口快，得罪人多稱呼人少；辦公室內更擺放一個舉着中指的模型，十分過癮。（陳浩樂攝）
「（林超英）咁蠢嘅？點做天文台長。」
（何少忠攝）
兒子胡文新的房間只是一牆之隔，對於這個接班人，胡應湘十分放心，「佢條路自己決定，佢醒目㗎喇！」
「（捐地）係呢個世界
最滑稽嘅事！」
「炒樓（問題）係傷風，你（醫）嗰劑叫化療！」胡應湘是工程師出身，地圖常伴左右，貼在身後那幅牆的是香港地圖，左邊矮櫃亦放滿一幅幅已捲好的地圖。（陳浩樂攝）
這時他拿着白紙，畫上一個金字塔，比喻為社會，解釋房屋政策之「重」：「（中間嗰批人）出啲力就可以上到去，（最上嗰批）唔使幫，更要抽稅，幫最底嗰層，社會先會穩定流動。」他指，最底層的一群是最絕望的，要讓他們有希望向上流，「一定要起公屋，起碼有瓦遮頭，再有小型積蓄，先有向上流嘅希望。逼香港人住籠屋，係 Cage Animal，心理學家做晒實驗，老鼠困得耐啲，當堂都好勇鬥狠。點解要困住香港人呢？點解唔起公屋，等啲人唔好咁多戾氣？你（行山）嘅快樂，卻建築喺人哋痛苦身上。」
化療醫傷風
近年政府左撲右撲「搶地」，其中一招「收地」，胡應湘亦頗為質疑：「政府賠錢一千呎收我塊地，但第日升到三千蚊，對原有嗰個好唔公道。」最終只會導致市民不願放地，他憶述：「以前英國佬唔係，佢用 Letter B（乙種換地權益書。土地持有人可以持有的農地換取住宅地），五呎農地換二呎屋地，即係政府攞多咗地方起屋，再俾番張欠單你。你可以賣俾發展商，更不會有強搶民產的意思。唔見農地的市民換咗塊地，又可以保留升值價值，仲有彈性係容許自由買賣。呢個政策點解唔重推呢？」
愈說愈勞氣，對於樓市辣招，胡應湘只劈頭一句：「香港（樓價）係畸形夾到咁貴。」他輕敲桌面道：「（政府）呢個變相係斂財啫！市民已經辛苦，你仲要交印花稅，咪即係令佢百上加斤。結果唔理青紅皂白，全部打殘。炒嗰個（問題）其實係傷風，你（醫）唔好用最猛嗰劑，嗰劑叫化療！」他預期樓價會下滑。胡應湘檔案
胡應湘（右）與太太郭秀萍（左）
出名是恩愛夫婦，訪問時亦突然自爆：
「最多謝老婆，我有個好老婆。」
中學就讀港島華仁書院，自言無心向學，但胡應湘仍能考入美國名校普林斯頓大學，就讀土木工程系，圖為大學畢業照。
鬧政府：進退失據
去年特首選戰前，胡應湘與兒子胡文新曾現身梁振英競選辦，招來「梁粉」疑雲。這次胡應湘承認曾與梁振英私下會面一次，就房屋等政策發表意見，不過梁振英「無任何反應」。
「佢（梁振英）苦笑囉！佢唔係唔想做嘅，只係而家進退失據。個個鬧兩句就神聖不可侵犯，我要郊野公園，你又寫低佢，我要房屋，你又寫低佢，巧婦難為無米炊。我哋要一個強勢政府，唔能夠一聽到有人反對就縮，你要知道自己個政策想點。」胡應湘強調先謀定而後動，現政府明顯無「謀」，「政綱要折衷， Compromise（妥協），無話有萬能丹的。」但他認為政府能扭轉頹勢的機會不大，並嘆道：「政府無啦啦唔會變強，應該點？無嘢可以做。睇住香港，會一路衰，你衰到貼地或者先有機會（反彈）。而家（政府）咩都唔郁得，香港已經開始 decline了。」內部僵化 「香港二流社會變三流。」
他再彈：「多爭吵，又無好政策，削弱晒競爭力，香港變成二流政府，整整吓變三流。而家政府係僵化。」他冷笑說：「奶粉政策更是滑天下之大稽，走白粉都唔使罰咁多錢，連澳門政府都識直接搵（做生意嗰班人）交涉。」
胡應湘亦身受「僵化」所害，「叻人唔會做公務員，後生仔點會肯入去呢？我按程序入則，負責批准嗰個人唔係研究點樣幫你批到，而係研究點樣唔好俾人鬧。」他說簡單如設置街板，亦要經九個部門同意，官僚至極。又如梁振英一方面提出增加土地建屋比例，但政府部門另一方面卻提出削減；而啟德用地已丟空十數年，東九龍規劃未完善，胡直言情況已是「籠裡雞作反」，「自己拗撬，做唔到嘢。香港等死。依家見港大，邊有人肯做校長，容乜易下一步學生同你鬥爭呀？」飛俠胡應湘「決戰」超人李嘉誠
七八年，胡應湘（左二）牽頭，與李嘉誠（左三）、鄭裕彤（左一）及馮景禧（右二）合組財團，在廣州投資興建中國大酒店。
胡應湘與李嘉誠相識接近半世紀，七八年於廣州發展中國大酒店，是兩人首次合作。至八七年又合作競投九龍灣展貿中心地皮，同年五月合和供股集資五十億，長實又包銷一成三，兩人老友鬼鬼。
不過，後來胡應湘因洋名「哥頓」而被稱為「飛俠」，李嘉誠就被譽為「超人」，友情開始變質。近十餘年，雙方關係更因兩個項目益發緊張。先是○二年中，胡應湘的港珠澳大橋藍圖，構思在大澳興建貨櫃碼頭；這將影響和黃利益，雙方因而割席。當時胡一句：「李先生變了。」超人頭馬霍建寧即越洋反擊：「唔好做我嘅世界。」
一年多後，胡應湘的 dream project——「灣仔 Mega Tower酒店」受到阻攔，爆出強烈反對項目的堅尼地道居民陳富強，原來與李嘉誠關係密切。胡應湘這才如夢初醒，並大爆曾收過一個電話，對方指項目不會通過，着他將地皮轉售。論誠哥撤資：好爽脆 「佢（誠哥）份人好爽脆！」
對香港前景無望，記者未曾開口問他去向，胡應湘已經斬釘截鐵說：「我無準備撤資。」
同在商界打滾幾十年，李嘉誠近月頻頻出招：百佳賣盤、分拆港燈、傳聞屈臣氏上市，撤資意味甚濃。胡應湘對超人決定不願多談，幾經追問才說：「唔知係咪撤資，撤都唔出奇，佢八十幾歲人，唔係咁緊張。」又說：「佢變唔變，唔係咁清楚。但交手咁多次，佢對人對事都好均真，好爽脆，牙齒當金使，講一句係一句。」數十年相知相惡，「乜嘢甜酸苦辣榮耀都見過晒，我諗佢同我都有呢個感覺——為香港可惜。」
眼前亂局，使胡應湘回憶起過往殖民地政府的施政。他認為英國帶來法治，成為香港的核心價值，又論及房屋、醫療及教育這三大基石，「廣東人話嘅，大家都有瓦遮頭，仲有好多人忘記咗嘅天台小學，令少機會、少資源嘅人，都可以有機會和希望，一直行之有效。」他特別提到社會福利，「一九二九年大蕭條，美國總統羅斯福想出製造就業，工人返工，一人一日一蚊，是為 workfare。」後來 workfare變成今日的 welfare，「社會福利做得唔好，會係一個計時炸彈炸死自己。你睇美國政府有十六萬億國債，奧巴馬仲要伸手攞錢喎！第時香港有普選，議員為爭取票數，會亂咁要求加福利，累死香港。」他強調年輕人不要攞綜援，並打趣道：「呢啲係毒藥！如果我老豆俾一大筆錢我，我都會游手好閒，變咗二世祖，好多女仔有難。」談中港矛盾：友好協商 「我為香港可惜！」
對胡應湘來說，爭奶粉、爭幼稚園學額、爭資源，都可以反成商機。他建議在河套位置，取兩至三平方公里土地，開闢一個包羅住屋、飲食及旅遊等需要的商貿城。說得興起，他馬上翻出地圖，又在紙上寫筆記，「大陸人嚟到，圍住佢，唔入嚟香港，連簽證都唔使。全世界邊個國家唔係賣廣告叫人來旅行？新加坡都流緊口水啦！」
早於七八年大陸改革開放，胡應湘已回內地發展廣深珠高速公路及發電廠，押注大陸。當時內地法治只是初級階段，胡直言「摸着石頭過河」，「阿叔我無驚過，因為信鄧小平。佢曾三起三落，對改革有決心，亦有切膚之痛。」當時胡應湘在內地的合同，條文只註明：「如雙方有爭議，透過『友好協商』解決。」面對上海自貿區及前海等「特區」來勢洶洶，胡應湘叫大家放心，「唔使擔心！香港最大優勢係法治，國內暫時無呢個制度。」
已經七十七歲的胡應湘與記者談笑風生，更說：
「我諗好少地產商講嘢咁痛快！」（何少忠攝）
胡應湘（前排左二）跟家人感情深厚，其父親是鼎鼎大名的「的士大王」胡忠。（前排右二）
合和中心採用圓柱體設計，由胡應湘親自設計，是他最滿意的作品，八十年代初落成時，是全港最高的大廈。前方是合和二期的地盤，胡應湘這個心血結晶，與多方周旋達四分一個世紀後終可動工，有望於二○一七年完工。（廖健昌攝）
行將退休 時不我與
胡應湘每天仍自己駕車到合和中心上班，其坐駕是 Nissan Leaf的環保車。（廖健昌攝）
胡應湘在美國普林斯頓大學畢業後回港，六九年創辦合和經營地產建築，曾與長實、新地、新世界及恒隆合稱「華資五虎將」。後來合和專注內地基建、泰國鐵路，規模漸與其他四虎拉遠，現合和連同分拆出來的合和基建，市值共三百五十億。匆匆四十四年，兒子胡文新接班，他坦言無甚教路，「我最記得老豆教我，錢要自己搵返嚟才能享受，我都係咁教仔。」
他每天仍自己駕車到灣仔上班；在灣仔出生，在灣仔成長，他一直希望打造一個灣仔王國，在腦海構思多時的合和中心二期仍是爛地盤，完工之期最快為二○一七年。胡應湘先摸一摸木桌子，「我擔心身體，好彩健康好好」，再用手指一指合和二期地盤位置：「我想退休，但係要搞好隔籬先，係最後一擊，時不我與喇！」一人一句論走資
誠哥撤資令全城嘩然，引發對香港前景的疑惑；除了胡應湘，政經界名人都各有睇法。
全國政協常委陳永棋：
（《蘋果日報》圖片）
「你有無聽過『十年一覺揚州夢』？香港唔爭氣，就好似揚州漕運咁，當興建公路後就無咗競爭力，最後揚州得番三把刀：廚房刀、飛髮刀同批腳甲刀。而家香港人終日將焦點放喺矛盾，政府又積弱，咩都做唔到㗎，終有一日香港會 collapse。」
股壇老手詹培忠：
（關永浩攝）
「李嘉誠係全港最唔開心嘅人之一，因為佢一日要諗太多嘢喇！我相信社會愈亂，愈係機會，所以即使佢撤資亦無所謂。一雞死一雞鳴，香港下一隻大雞係邊個？馬雲呢個仔幾巴閉呀！」
政壇元老李鵬飛：
（《蘋果日報》圖片）
「誠哥同梁振英從無磨合過。聽到不少左派聲音，話『嘉誠哥，你要撤咪撤囉』，佢不嬲多外國投資，好多年前香港嘅投資，已佔集團總投資不足兩成啦，而且內地大把人對香港有興趣，唔使靠佢。香港前途？仲要睇多一排，因為明年就佔領中環。」
前滙豐大班鄭海泉：
（于港民攝）
「我唔覺得（李嘉誠）係撤資，呢啲買賣嘅嘢嚟嘅。香港嘅競爭力係無以前咁大，周邊好多地區都趕上來，例如上海及新加坡，相對吸引力，不及以前。但香港經過咁多波折，我對香港無失望，一個社會自然有好多問題要解決，大家耐心啲。而家社會撕裂得好犀利，香港人要學吓包容。」
亞洲金融主席陳有慶：
（張國慶攝）
「佢（李嘉誠）有錢賺，自然要 take profit，係生意行為，唔係撤資。我喺香港幾十年，經過咁多次上上落落，最後香港都係福地，無理由去撤資。繼續有好嘅機會，我哋都會去投資。」
霍英東集團行政總裁霍震寰：
（廖健昌攝）
「我睇唔係撤資。可能歐洲而家回報率高啲，多平嘢執。我哋幾十年來對香港都好有信心。香港經過幾次轉型，都愈轉愈好，又有中國喺背後，係強大嘅支柱。最近講緊自由貿易區，國內愈來愈開放，香港可發揮作用。」
