粗口只是輔助 - 曾志豪
究竟香港呢個城市，對粗口嘅態度係點樣？
林老師事件，幾多人殺聲震天，喊打喊殺，激動到要出嚟集會聲討，唔少家長都話粗口教壞細路天亡香港下刪三百字。
按此觀察，香港理應是潔癖都市、道德高尚之地；但同一個城市，卻又掀起無可抵擋的，路姆西熱潮。
此潮物狼公仔爆紅，最大原因便是粗口諧音；買的人就算唔關心政治，但知道這是一個粗口諧音公仔，已經足夠興奮。你試吓呢隻狼公仔個名變成係「路路暢通」、「路不拾遺」、「路邊野花不要採」，即使個狼相再造型神似，也不會掀起這種七級半地震的狂潮。
粗口，就是這隻狼公仔的靈魂。
這我便想不明白了，這個城市一忽兒為了粗口諧音欣喜若狂，一忽兒又為了粗口嚴詞責罵。粗口公仔賣到斷市，我不知道有幾多顧客當日同時有份指責粗口老師？我地其實係接受粗口，還是有粗口潔癖？
Tree根也成為粗口諧音風波人物，我未見過有政治人物要特意發聲明澄清自己訪問無講粗口，Come on，蛇齋聯嘅山西布政司馬大狀，一句F××king Chinese講完都無發表聲明解釋啦，Tree根何必介懷？
但同時，我也要勸網民，何必把Tree根的粗口諧音放到咁大嚟玩呢？成件事得一個point，想造佢講粗口然後恥笑佢；我當然不會介意你恥笑應該恥笑的人，但如果你今天恥笑佢講粗口，那麼昔日人家攻擊林老師的粗口，豈非也是合情合理？你覺得講粗口好大件事，那麼人家便同樣把粗口當成攻擊的借口，其實兩敗俱傷。
粗口真係no big deal（deal字唔係粗口，利申先），只有粗口名字而無狼相嘅公仔，你也不會買。有些人站出來，本身已經是一個粗口啊！
发自我的 iPad
