明星名人愛吃清湯腩 發哥Eason排隊幫襯
位於中環歌賦街嘅九記牛腩，曾獲飲食網站開飯熱店大賞，最出名當然係賣牛腩，不過啲服務態度之「優」亦非常馳名。儘管係咁，依然每日客似雲來，當中更有唔好名人明星走去幫襯，包括最最親民嘅發哥周潤發。
周潤發
唔少明星去幫襯食肆時都會被店員要求合照留念，更何況係見到發哥同發嫂？九記老闆潘權輝曾經喺2013年接受《蘋果》訪問時提到，啲明星去幫襯時要求同佢合照，所以佢先影，而且佢只會將啲相掛喺二樓唔當眼嘅地方，但係發哥嗰一張，佢坦言係自己要求嘅，可想發哥個地位幾咁與別不同。
李連杰、向太陳嵐
動作巨星李連杰雖然唔多時間喺香港，但係佢嚟香港時都會幫襯吓啲出外食肆，好似喺04年，佢由美國返香港拍廣告，一唔使開工就約埋老友向太陳嵐去上環睇佛珠，之後轉場去九記醫肚。
任賢齊
台灣男星任賢齊有一段時間經常來港，原來佢唔使開工嗰陣，都會去飲飲食食，喺04年11月，小齊就被《蘋果》撞見佢帶埋司機同助手去九記開餐。
陳奕迅
「吹神」陳奕迅亦係九記客仔，雖然佢貴為天王，但佢幫襯時毫無架子，同其他食客一齊逼喺圓枱開餐。
滕麗名
3年前嫁畀朱建崑嘅滕麗名，舊年都被目擊獨自揸車去九記買外賣，當時薄施脂粉嘅阿滕喺落單後，同店員吹水打發時間，約10分鐘左右就拎住兩大袋外賣離開。
上一則: 【馮仁昭四圍超】阿B孖鍾懿嘆牛腩
下一則: 抗寒10潮物
Z88
