刺激歐遊 - 左丁山
暑假季節，幾個常設飯局都唔夠人參加，因為大家在不同時間放假，各散東西也。呢日在喜萬年吃午飯，正常有十二三人嘅，但只有八人出席，由法國H做東（因為佢曾在法國讀中學及大學，故稱法國H；大家有關法國之事都問佢。）法國H點餸除咗例牌嘅喜萬年燒乳豬之外，還有蒸海青斑及一味以前未食過嘅蟹肉冬蓉，一大塊厚厚長方形冬瓜以蟹肉及上湯煨之蒸之，冬瓜入晒味，入口又爽又甜美，在大熱天時，認真啱口味。
地產F就細心用刀將冬瓜切開鎅細做冬瓜粒，再攪勻先至食，與湯水一齊飲，問佢點解要食得咁細緻，地產F話，幾日前做完口腔手術（oral surgery），故此特別小心。月前佢要做眼部手術，有一日不能視物，今次就有一天不能開口說話，地產F感嘆話：「呢幾個月先至真正知道有眼無視力及有口難言嘅苦況，各位大佬請珍惜健康，及時行樂，可以食得就食嘞！」
年紀大咗，就知道能活到今天，仍能行動如常，五官無礙，食得瞓得屙得，係一件幸福之事。投資W就懂得及時行樂嘞，佢啱啱去完歐洲旅行返嚟，話歐洲旅遊全面反彈，到處都係全球遊客，旅遊熱點極為熱鬧。唔怪得紐約時報話奢侈品公司股票十分好景，最好景嗰隻係Kering，旗下有Gucci在今年上半年營銷額急升43.4%，YSL收入升28.5%，Alexander McQueen及Balenciaga亦增長可觀。LVMH就宣佈第二季營業額上升12%。
Kering呢幾隻牌子曾有老化及不合潮流跡象，點知公司突然爆出一位創意設計師Alessandro Michele，2015年先至上位，憑此君一人之力，復興Gucci產品，全球女士追捧，據講前輩Marc Jacobs也成為粉絲，倫敦Bond St.店門外日日有遊客排隊入內購物，一個天才做creative director有此起死回生本能，多多薪酬都值啦。
投資W去歐洲並非購物，旅程比購物刺激幾十倍，佢應邀參加保時捷遊覽團，全世界有幾十個保時捷車主發燒友參加，投資W嘅老友做司機，由塞爾維亞出發，揸車去捷克，以布拉格為終點。沿途有車廠專用車指導行車方向，幾十部保時捷行走歐洲著名嘅彎曲山路、鄉村小館，彎彎曲曲咁樣飛馳，十分刺激，投資W話：「我位朋友已好克制，時速百幾公里啫，沿途食塵，段段包尾，帶頭嘅行到三百幾公里時速，好似睇Vin Diesel做戲！係好好玩，不過我玩一次就夠咯！」
Z88
