又到宵夜時間～返返嚟毛毛毒L食譜，今日同大家整簡單到喊嘅微波爐芝士炒蛋，唔講係微波爐叮拎上碟扮真炒蛋都呃得下人㗎！
首先將一隻蛋打落個兜度，發開佢。
之後放一塊芝士喺中間～
點解要落芝士呢，除咗毛毛鍾意食之外，仲係因為芝士會令到啲蛋夠咸，一嚟唔使行去廚房攞鹽，二嚟唔使自己落鹽咪唔使驚落得多得滯咸到腎虧囉。
好喇，咁就拎去叮分半到兩分鐘，未熟就拎入去再叮多幾廿秒，唔好叮太耐呀，啲蛋熟得滯會老㗎！
為咗本節目嘅效果，毛毛為大家放棄死都唔洗多隻碟嘅原則，嗱上咗碟成件事即刻唔同晒係咪呢～ 啲芝士同啲蛋溶埋一齊，真係好邪惡呀。
不過...喺毛毛洗返個兜嘅時候，先發現原來頭先個膠兜好似冇應承話放得入微波爐......
唔知呢碟蛋會唔會令呢篇食譜成為毛毛最後一篇文呢......再見喇各位......
根據調查顯示，十大香港人最鍾意post嘅相其中一位就係三文魚刺身！嗯～諗起都覺得正呀，不過聽講得多會生蟲，同埋你知啦，毒L邊有錢食咁多日本嘢呀！唔怕！今日就等毛毛教大家一個祖傳毒L食法！
平價版三文魚刺身嘅材料包括：牛油果、豉油、糖呢兩茶匙，仲有啲橙皮𠻹。
可能大家都好煩惱，到底牛油果點揀先係靚呢？好似好難分生定熟咁喎！話明祖傳秘方，毛毛係唔會教你哋睇顏色咁膚淺嘅。揀牛油果嘅時候，拎埋耳邊聽下聲，如果聽到佢話「揀我啦揀我啦」就千祈唔好買，如果冇聲呢，揀佢就啱喇。
之後就可以用鐵匙羹挖啲肉出嚟，小心唔好太為食食咗粒核呀下。
除咗牛油果，豉油都一樣好重要。識食一定係用一包包仔嗰款壽司豉油，咁先可以呃自己呃得最徹底。然後就倒出嚟當佢紅酒咁「啷」下佢，睇下夠唔夠色澤。呢個step冇乜實際意義，主要係增加些少中產生活態度咁。
基本上你已經完成呢味偽・三文魚刺身喇！記得食嘅時候要用筷子夾起啲牛油果，慢慢咁點豉油，再放佢入口。簡直好似幾十條生猛嘅三文魚喺口入面力爭上游咁fresh嘅感覺呀！咪話毛毛唔提你，一定要合埋眼先好食呀！自製假想能延續故事呀嘛！
【毒L識食系列】
