【中國有好西 】地獄廚神徒弟江門響朵：開餐廳好易爆
即時財經
2017-08-08 00:00:41 HKT
十二年前一夜成名的80後蔡家富（Gabriel），是英國地獄廚神Gordon Ramsay的烹飪大賽冠軍，更是首位亞洲人獲此殊榮。以為揹住廚神徒弟之名定必名成利就，實情卻說服不了父母接受自己投身做「廚房佬」，惟有壓抑創業的理想，用六年時間在理大等執教鞭、主持廚藝節目等說服家人自己鍾情做廚，終於兩年前「回歸起點」，北上開西餐廳做廚師。
Gabriel 的爸媽與天下父母一樣，希望小孩生活安穩。即使廚神徒弟名銜響噹噹，但他直言「爸媽說畀你讀咁多書，你去做廚房，他們覺得很失望」，更怕他太辛苦，怕他不堅持，兼「半途出家就找不到工」。Gabriel的父母最想他教書，所以他願意花上六年時間滿足他們期望，同時做廚藝節目主持等，用行動來證明自己的堅持，也證明他自有出路謀生。
兩年前選擇返內地創業，全因在做Now TV飲食節目時，遇上伯樂—拍檔主持Ricky師傅，獲對方邀請一齊北上搞平價西餐廳。「好多開餐廳嘅，都係好有家底去開。否則正常一個廚師，你講緊可能係用一生人的首期去搏一舖。」
香港的競爭大、成本高昂，餐廳要熬過創業期的首三、四個月殊不簡單，足見真章。當初Gabriel敢膽粗粗一口答應Ricky師傅，全因計過數，覺得「香港開的話，可以講贏面係細好多，更需要好大量的資金才敢開，而內地只係四份一的投資額。」
他指，內地成本低香港一大截，例如一間約1,300呎的舖位，租金只佔成本接近一成。午餐人均消費約40至50元人民幣（下同）、晚餐則80至90元，若勤快點一日做足四餐，第一間餐廳在三個月時間已回本。現時更成為內地網紅店，經常有人請求加盟，難怪Gabriel不禁也要說「內地市場係有發展。」
看回Season的餐牌，一客肉醬意大利麵25元、手製牛肉漢堡38元、鐵板牛扒48元、心太軟都要索價25元，價位對三四線城市來說相信已是中價。然而餐廳依然門庭若市，是否風水特別好，或是江門多富豪？非也，Gabriel指「江門人除咗食之外，都無乜娛樂，開餐廳好易『爆』，但能否堅持就要睇功力」。
眼前的Gabriel笑容滿臉，但也遮掩不了一雙疲倦的「熊貓眼」，原來訪問的前一晚凌晨四點，他才由江門趕至香港。原來近期他旗下的第二間餐廳新開張，「我一星期返嚟香港一次，有時忙起上來，返唔到去一次，三年日子就係咁過。」
現時他同拍檔已於江門投資7位數，開設兩間西餐廳及中央工場，Gabriel回憶開舖初期，「第一日餐廳開張已經爆，正常應有八個人手，依家我們得五個；本身想找親朋戚友過嚟坐爆個場，我哋都叫佢哋唔好嚟。」
當年Gabriel於外國做西餐，「嗰陣時做16、17小時，覺得好犀利。但我依家日做20個鐘，回家自己揸車，5分鐘的車程，有陣時我喺車度瞓着咗」，為了做廚，他仍甘之如飴，「一樣洗地、洗廚房，冧檔時幫手煮」，不惜跟員工由低做起，但數到最犧牲的，就是跟家人的相處時間，與太太及兒子分隔兩地，Gabriel卻笑說「我太太和我的小朋友絕對唔會返內地，我講過『禍不及妻兒』。」
一切看似順風順水，鍾情西餐的Gabriel卻目標遠大，還想抽時間到歐洲再學廚，繼而由江門殺上中山、佛山開舖，兼且發展其他西式fusion菜。不過滿腦發展大計的他，始終未忘香港。「我最終目標係返嚟香港開一間容納約20至30人的餐廳，賺唔賺錢唔係最重要，最緊要做啲有誠意嘅嘢出嚟！」這間小店，他說想凝聚一班有心的廚師，為他們提供一個場地，更寧棄旺區揀「山旯旮」，因為真材實料總有人欣賞，「到呢一刻只有一個目標好想做，就係做一個出色嘅廚師！」
記者：陳家恩 方楚茵
蘋果財經，關心你飯碗
http://fb.com/appledailyatm
十二年前一夜成名的80後蔡家富，最近北上開西餐廳。
Gabriel是英國地獄廚神Gordon Ramsay的烹飪大賽冠軍
近年香港最紅的廚神一定要數Chef Le Mon（謝霆鋒），仲話佢係港版Gordon Ramsay。小記膽粗粗問Gabriel對Chef Le Mon有咩評價，結果佢話「好少時間睇電視節目」，無意見呀…
