旅遊M睇本欄，知道左丁山不久前去過法國圖魯茲，大家呢日在中環碰頭，旅遊M順口話：「喂，有無時間去澳門一行，有筍盤益你！」左丁山話：「澳門酒店啲價錢好貴，唔抵啫，舊酒店又有可能暫停營業一日半日，見到一啲不明來歷人士，好驚嘅噃。」旅遊K講：「唏，有開幕冇幾耐嘅新豪華酒店介紹俾你呀，但條件係不能在周末入住，最好係星期日晚上到，星期四中午離開，咁就會平好多，你要在周五晚到，星期日下午鬆人嘅話，梗係收你好貴啦！」佢講嘅價錢與酒店名稱，確係幾吸引，但要在工作日去，難度幾高，要安排吓至得，唔係話一開聲就可以上船。旅遊M又話：「你去完法國吖，如果我地又係每星期工作三十五小時，去澳門玩吓就容易得多！」表面上係嘅，不過香港如果學足法國，香港經濟唔知點樣同亞洲國家競爭呢？最近股市大升，話係歐洲主要國家（德法意西）達成協議，注資銀行救市之故，但「金融時報」就大潑冷水，話ESM得5千億歐元資金（德國未肯同意增加額度），要救希臘、葡萄牙、愛爾蘭、塞浦路斯，甚至斯洛文尼亞，再加上西班牙，與購買意大利國債嘅話，邊度夠錢呀！默克爾夫人只答應買債，不答應增加ESM額度，咁就令到意大利以致全世界歡喜興奮，高手高招到極！歐洲還須自己救自己，十七個歐元區國家嘅失業率在五月份高達11.1%，係1997年以來最高，整個歐盟區有二千五百萬人失業，西班牙佔咗五百七十萬，失業率高達24.6%，攞歐洲國家盃冠軍算係打一支興奮針，令人民暫時忘卻煩憂，但酒醒之後，明天又如何？
即使如此，西班牙人仍然鍾意嘆世界，幾年前，西班牙工會告上歐洲法庭，要求病假（sick leave）如果在每年假期（annual leave）同時期發生（即係話工人輪到放大假時，突然病倒，不能享受假期），僱主不能扣除假期，工人病好後，可以再放年假，歐洲法院前星期裁決官司，工會勝訴，以後歐盟工人唔怕在放大假時病倒（例如傷風）就會蝕底，病幾多日，可以問僱主攞番幾多日有薪假期。西班牙工人每年最少有20天大假、病假，10天婚姻蜜月假，每次直系親屬出生，入院，死亡可以有兩日假，在西班牙如果夠運，搵到一份工，確係好嘆！
上一則: 感動到想哭的哲學考題 - 李怡
下一則: 「填充」題 - 尊子
没有评论:
发表评论