蘋果日報-津貼制惹人犯法 - 左丁山

新政府上場兩個星期就撻直，全城驚呼喝罵之餘，我地不禁擔心，以後五年如何捱落去？左丁山並非有厚愛於梁特首，競選時之批梁立場鮮明。今天睇到呢個政府一開始就舉步維艱，不知如何是好，唔通香港都要衰埋落去咩，我地總要搵食，維持低失業率，希望經濟增長，人工有得升㗎嘛，唔通願意捱過「建華七年」之後，又要捱「振英五年」咩？有人話任志剛突然間講兩句：「俾啲機會與時間予梁先生」，係唔係轉軚呀，還是收到信息，要和諧團結？左丁山相信唔係，情願相信佢係為咗香港好。呢日在陸羽食飯，律師W話麥齊光曾景文「對租」事件，在官場十分普遍，係唔係大罪呢？當然唔係，只係反映出制度上，倘若有房屋津貼、教育津貼呢類非現金利益嘅話，就會鼓勵所有有資格領取津貼之人用盡辦法去牟取津貼，爭到一毫子都唔好益番政府。有一位已故紀律部隊高層嚴守紀律，堅決不肯與同袍搞「對租」交易，每年「損失」應得租金津貼二三十萬元，曾經被人笑到面黃，話佢係儍仔。「食得唔好嘥」係高級公務員之行為標準，故此一窩蜂送子女去英國讀書，熱衷於謀取租金津貼。如張五常經常講，經濟學一個假設係，人是自私的，既然如此，如金庸以前寫社論話過「人不為己，天誅地滅」，高官有津貼在前，點會唔去攞呀，佢地又有不少空間時間一齊出埋去度絕橋呢！

從制度上根絕呢類「犯罪」行為，最好嘅方法就是全部津貼折現，計埋落人工度，例如今天醫管局嘅情況，或者話，咁樣用多好多錢噃，因為有啲人唔需要津貼，唔攞津貼嘅嗎，政府可以慳番啲！假嘅，有金錢誘因就會試圖攞到盡，政府為咗管理津貼之申請、派發、監控要動用大量人力，根本就已經係一大筆浪費，而且仲未必防止到濫用與犯法。梁振英政府如真要做一點實事，就係向立法會提出法案，撤銷所有不同名目嘅公務員津貼，全部現金折現，每月以月薪派發，跟住將管理公務員津貼之部門解散。

上一則: 劍橋喜劇家 - 陶傑