2012年11月12日星期一

蘋果日報- 微軟親生仔　換面登場

微軟親生仔　換面登場

講風頭，Windows 8近排可謂一時無兩，狂賣廣告之餘，不少品牌的相關產品更「瘋湧」而至；不過講到血統，當然係Surface RT最正統啦，話晒係親生仔，微軟當然不容有失，無論造工定硬件都係上乘之作，加埋力Sell的換面鍵盤，實用性與潮味兼備，微軟今次頭炮絕對夠響！

記者：韓繼聰　攝影：林栢鈞　模特兒：Tina

■Cover反到背面後即自動關閉功能，唔怕㩒錯掣。

剛勁外殼　型格換面

其實Surface RT的規格早已曝光多時，預售情況更相當理想，今日開賣，風頭亦應該幾勁。實機試玩，第一個感覺是造工非常好，一體化鎂金屬外殼夠紮實，黑鈦色的VaporMg手感相當唔錯，感覺唔易跣手及刮花，加上邊位起角線條感覺剛勁，專業味濃。大賣點的換面鍵盤，有Touch Cover（$968）及Type Cover（$1,048）兩款，Touch Cover非常薄，同一般保護套分別不大，手感也不俗，顏色豐富鮮豔，為機身注入大量潮味；而Type Cover則厚一點，但打字手感更好，「合體」後感覺更似筆電，加上利用磁力設計，合體分體都非常簡單方便。當反到背面時，鍵盤功能亦會自動關閉，不會誤㩒鍵盤，好貼心，設計無得輸，難怪在公司試玩時，不少同事都大讚有型！

■機身重1.5磅（676克），唔算輕，但攞上手感覺都幾紮實。

■Surface RT設支架，合體後似筆電。

■Cover以磁力連接，合體分體都簡單容易。

■VaporMg金屬外殼質感非常好，剛勁線條令設計更有型。

■Type Cover感覺同一般鍵盤相近，手感更好，暫時只有黑色。

■Touch Cover公佈有多種顏色，但香港暫時只有黑、白及藍三種色。

規格強勁 16:9睇戲一流

外表靚仔，內涵亦屬頂級，NVIDIA T30 1.3GHz四核、2GB RAM、32GB或64GB內存、10.6吋ClearType HD輕觸顯示屏幕，基本播片睇相打機及其他操作都相當暢順，試用USB直插播一段高清片，基本上即開即睇唔使等。畫面質素方面，雖然屏幕只屬1,366×768，但16:9闊屏設計「睇感」相當不錯，睇戲相當Fit，加上ClearType技術，顏色鮮豔，亮度足夠，層次感亦強。Surface RT身上除了有USB2.0插口，亦設有HDMI輸出及MicroSD插位，擴充性唔錯。

■機身右方設USB2.0插口及HDMI輸出。

■MicroSD插位設Kickstand下頗隱蔽。

■以USB手指直插直播高清片，唔使等亦夠順，畫質相當唔錯。

■於同一位置用同一Wi-Fi熱點開啟網頁，比New iPad更快。

成也Apps　敗也Apps

Surface RT最大嘅賣點係Win8，最大嘅弱點亦可能係Win8。它可隨意切換平板或一般桌面形式的Win8，對於大量屋企都係用緊Windows嘅用家嚟講，操作性同親切感都非常高，加上機內本身已預載了大家用慣用熟嘅Office，實在相當方便。但同時，Win8始終未係主流，雖然Surface RT預載唔少實用Apps，但「市集」內的Apps數量，與iOS及Android的數量相比，依然係「蚊髀同牛髀」。不過，從Win8嘅近來氣勢，微軟博盡力推，加上Win8手機即將登場等等因素嚟睇，Win8的普及程度有望大增，到時自然有大把Apps玩啦！