高鐵影響樓價
從法政大學之Rangsit校園出來，司機直奔周末市場「澤杜澤」，此日並非星期六，去周末市場做乜？泰國A話市場旁邊有一個商場叫做JJ Mall，全部係小商店、家庭戶/個體戶經營，有不少廉價趣怪嘅產品發售，唔趕時間，慢慢行最好。
郊外唔塞車，好快就到，一上到去就見一間小店專賣燙畫T恤，有不少獅虎狼及動畫魔鬼肖像T恤，畫像栩栩如生，好靚噃，左丁山卒之揀咗一件較為「和平」嘅馬肖像T恤，價錢240銖，左太想講價，店員老太一口拒絕。行到腳軟，見到一位少年人坐鎮嘅專門店，內裏有兩部日本Brother電腦車衣機，由觸點式螢幕輸入畫像及指示，指示衣車自動車線，我地見到嘅有一隻狼肖像（車在衣領），及一個枕頭袋，車上英文字I（心形）You，Fom: John Doe（假名），全部自動化，少年人顯然係熟手技工，控制電腦衣車非常純熟。左丁山好想幫襯，但少年人話：「自己來衣料。車工一百六十銖，但今日柯打滿晒額，你要預訂，最好後日再嚟！」咁好生意，做得過喎，唔知兩部Brother電腦衣車要幾多錢一部呢？
行行吓，見到一間不銹鋼匙叉店，一對匙叉係泰國人吃飯之必備用品，只售九十銖，我地一買就買十二對，左太話在香港唔會有呢個價錢嘅喎。
行到腳軟又上車去附近之Lat Phrao中央百貨商場，此店離市中心甚遠，不怕Paragon競爭，果然內裏人頭湧湧，似沙田新城市廣場，地方就當然大好多，食肆林立，生意好到不得了。曼谷有咗高鐵以後，市中心商場及百貨公司，不在高鐵站旁者，輸蝕晒，在高鐵站旁邊嘅，就俾Paragon搶晒生意，大公司如Central（中央）亦不例外，是隆（Silom）路中央店已改裝為寫字樓，Chidlom中央店本是名店，頂樓之Food Loft人流大減，Central World亦然，素坤逸路之Emporium受同一遭遇。現代大城市之中，零售商場之價值，因交通擠塞關係，幾乎全部受高鐵/地鐵線路的影響。香港早有此經驗，現曼谷趕緊追上，在四季隔籬高鐵站對面之曼谷St. Regis住宅賣到零舍貴，同一道理而已。
没有评论:
发表评论