2013年8月18日星期日

蘋果日報- 趣BLOG BLOG：　地產佬講嘢　信一成都死 - 股榮

趣BLOG BLOG：　地產佬講嘢　信一成都死 - 股榮

■施永青憤怒地放售的商舖寫字樓，似乎全部都勁賺。

中原地產大老闆施永青繼早前上街遊行，抗議政府辣招辣死代理後，近日再怒火掟貨，指想趁機會調整個人投資組合，目前他個人投資組合內，物業佔約五成，目標希望降至三分之一。姑勿論老施晒冷沽貨傳聞屬真屬假，但最惹人反感的，是其輸打贏要的言論。

當記者問到老施沽貨誘因時，他氣憤地表示：「最主要係香港𠵱家仇視地產投資者，呢啲係地產霸權，仲做嚟做乜呀！做乜要俾人哋當係地主咁鬥喎！」一向都頗敬重施先生，對下屬好、有生意頭腦，但此番說話，活生生揭示地產佬唯利是圖的本質。每一種生意及行業總有盛衰周期，自2008年金融海嘯極速復蘇後，地產代理進入前所未有的膨脹期，人數由不足2.4萬人飆升六成至現時約3.7萬人。統計美聯物業（1200）過去十年（2003至2012年），賺足九年，只有2008年海嘯年要蝕約4,000餘萬，十年間利潤合共超過30億元，估計規模相若的中原地產，應該只好不差。

CY狂出辣招令代理無啖好食，碰上新盤久未發市，二手冷淡，地產代理打悲情牌叫救命，老實講，不值得同情。施生話現時的感覺恍如被人鬥地主，但坦白說，他放售的商舖寫字樓，全部都勁賺，賺到錢仲發老脾，咩料啊！當然他旗下地產代理近數月可能見紅，但在逆風時輸了幾鋪就叫救命，點解佢唔提到昔日多年順境時，鬥地主贏到盤滿缽滿時，可憐我們這班農民被炸到「血肉橫飛」。

行行有低潮　出口術惹反感

物競天擇、適者生存，代理賺錢時唔會分畀我，好市時個個代理戴勞力士、揸賓士，點解一遇到挫折，就好似全世界對你哋唔住，老奉要畀錢你賺，要撤招救亡，這種輸打贏要的態度，尤其可悲。每個行業總會遇到低潮，首要按環境調整策略、改變人手，代理寒冬不是今天的事，現時出口術，只會圖添反感。

其實大家對代理言論，不必過份着緊。事關他們不怕升市跌市，最怕牛皮市，金句越爆、迴響越大，大家認真就輸了。統計近兩年代理老闆對樓市預測，發現誠如施生及美聯老闆黃建業對樓市預測，一樣錯到離譜，最經典是施生去年初估樓市會跌一成，結果全年升兩成（見表），稱得上「信你一成，死多兩成」。