梁振英在峇里島見阿基諾三世，俾菲律賓過咗一戙，唯有擒擒青向傳媒澄清，菲律賓政府叫做唔茅得晒，主動提出馬尼拉一張報紙之put behind（放下）之語，係漏了前面有working一字，原來用語係working to put behind，另一個報導就係take steps to put behind，咁就真相大白。馬尼拉報紙明顯係斷章取義，陷害梁振英。
但梁政府點解唔第一時間發表會談紀要，主動向香港人說明呢？特首辦主任、保安局新聞官、特首辦新聞統籌專員（現從缺，冇得鬧）等職位都要負責任，即使雙方有協議，沒對方同意之前，不能主動單方面向傳媒透露，但阿基諾三世見梁振英之紀錄片，已見諸菲律賓電視，佢做了初一，梁振英做十五都怕得啩，最多咪唔正式發表，而係搵親近官方嘅一兩張報紙主動放料囉！
香港政府不搞外交，非自今日始，以前英國外交部搞晒，麥理浩、尤德、衛奕信係外交官出身。彭定康係保守黨政治明星，佢地四位當然熟悉外交事務禮儀及談判技巧，但梁振英係測量師箒噃，從未做過政府行政對外工作，對住狡猾過人嘅菲律賓總統，點會攞到甜頭吖，呢次若不是習近平在峇里島見梁振英後，叫手下跟進馬尼拉慘劇事件，恐怕阿基諾三世都唔會臨時安排與梁振英會面。
北京三年來對此慘劇冇乜動作，今次點解突然出手，習近平指示跟進，李克強當住阿基諾面講「傷害中國人民感情」（要注意，李克強對阿基諾講慘劇之片段，央視不播放）呢？明顯係做俾香港人睇嘅。一位向來心水清之China Watcher對左丁山講：「香港人幾天真嘅，中央做幾件令香港人舒服嘅事，香港人就會安樂晒。三年來中央領導人第一次稍為認真啲關注慘劇，好可能（一）與南海爭小島有關，藉此壓一壓菲方氣焰；（二）香港政改方案諮詢將要出台，一定要按基本法辦事，不搞公民提名及佔中，中央如能在慘劇事件顯示力量，令港人感激嘅話，中央指導政改，就更加有權威性。」唔，中共不會有無緣無故的愛，一切政治掛帥，中央關心關注香港民生之事，陸續有來。
发自我的 iPad
没有评论:
发表评论