�果日�- 足球政治 - 左丁山

足球政治 - 左丁山

世界盃舉行之前兩個星期，馬雲買入廣州恒大足球隊的50%股權，作價12億元人民幣，看起來是內地兩大「土豪」的交易，兩人在香港共飲，飲醉後次早，談了十五分鐘就拍板做大刁，都不知事先有無做過DD（盡職審查，due diligence）。話馬雲買入其實係阿里巴巴集團向內房股恒大地產（3333）買入附屬公司廣州恒大球隊的股權，即是兩家大公司的交易，但馬雲與許家印老闆完全不須事先諮詢各自的董事會和委任核數師、財務顧問查數及聘請律師談判收購協議的條款，簡直不是一家具有公司管治架構的大公司所為。買入這樣的公司的股票的小股東，毫無權益可言。

馬許嘅作風，夠晒粗豪，兩人視公司資源為己有，似足一人公司作風，可見馬許頭腦落後。馬雲嘅IT創意與生意頭腦雖然屬天才級，但當佢越來越有錢之後，過份自負、自信，佢曾誇誇其談大講阿里集團合夥人制嘅好處，其實買恒大球隊一事，已顯示佢嘅獨裁者作風，港交所受證監會及本港各界壓力，唔俾阿里集團在港上市，啱到極。

十二億買廣州恒大五成股權，即係球隊估值24億（人民幣），遠高於英國足球網站Transfermarkt嘅估值2.1億，許家印與馬雲簽約後聲稱會再搵20個投資者，每個以六千萬元買2%，即是集資12億元賣出40%，總共可匯集24億元現金推動廣州恒大嘅未來發展。

馬雲與許家印在香港飲酒傾生意，喺邊度傾？據講唔少內地上市公司大人物來港玩樂，鍾意邊飲酒邊賭番兩手德州撲克（Texas Poker），通常在本地富豪擁有嘅私人會所舉行，若冇番咁上下身家，唔會受邀請入局，大家玩咗一輪，真情漸露，傾生意就比較率性一啲，閒話一句就可以決定十零億元人民幣咁濕碎嘅交易。今時今日在中國大搞足球，算係政治正確，因為習近平不止一次講過，佢有一個夢，夢想中國成為世界足球強國，打入世界盃決賽週。馬雲與許家印如在呢方面可以報效國家，圓國家主席之夢嘅話，在中國會紅過清朝嘅紅頂商人啦。