�果日�- 美帝文明� - 左丁山

美帝文明啲 - 左丁山

泰國R在中午飯局講及泰國政局，佢話曼谷已取消宵禁，情況正常，往曼谷旅行完全唔駛驚，佢又講及日前有一位泰國美女與三四百人在市中心示威支持民主反對獨裁，事後收到軍政府通知，要向軍方報到。呢位美女就唔去報到嘞，索性到Central World外裸露上身再抗議一次，成為大型花邊新聞。

BBC派記者到泰國東北訪問紅衫軍，發現槍桿子威力甚大，曾聲稱反對政變嘅紅衫軍男男女女已噤口不言，全部低調晒。原來陸軍政變，藉口係維穩保持國家和平，實質就係奪權，上台後粗中有細，搞社會經濟，將他信英祿嘅經濟政策搬字過紙，照做，一樣高價買米收買農民，繼續推動大型基建，穩住就業，又強迫獲得世界盃轉播權嘅衞星電視公司全部免費轉播世界盃，令人民睇波快樂！但電視公司唔快樂呢，要政府俾錢呀，咪追索咯，包保有拖無欠，追到下任政府上台都似。邊個係電視公司大股東？哦，新加坡大戶淡馬錫吖嘛，實際就係新加坡納稅人津貼泰國人民啦！

軍政府如此做法，基本上違反黃衫軍嗰套，但黃衫軍主要分子係曼谷精英，精英最緊要講穩定環境做生意賺錢，而且眼中釘係他信，他信派系不再掌權，萬事可休。軍人上台係為他人作嫁衣裳？非也，大權在握之巴育將軍親自兼任「投資局」（Board of Investment）主席，阿黃你明白未？一如昨日所講，萬事不離一個錢字，幾乎萬試萬靈。俗語有云，大丈夫不可一日無權，有權，就有辦法積累財富啦，方法不同而已。中國東南亞嘅舊方法係在當權期間收水自肥，任用親人當要職自肥，衰咗就被清算為貪官斂財。英美嘅文明方法就係爭取捐款競選或與政治人物維持良好關係出任要職，任內千祈唔好貪財喎，掙得好名聲，做官三五年之後就辭職，入商界搵真銀囉！希拉莉話克林頓離開白宮時，負債太多，幾乎破產（有冇人研究過邊啲人係克林頓債主呢，後來啲債主有乜得益呢？）但一年之內，靠演講費償還所有債務！伯南克做聯儲局主席時，權傾世界，但年薪未夠20萬美元，𠵱家呢？一場演講已近25萬美元，此之謂「延後利益」，但唔係貪污噃，美帝真係好文明，精過中國好多㗎。