2014年8月27日星期三

�果日�- 【房�涉毒】靠山曾��危 �近平�面俾成�救子�痕

【房東涉毒】靠山曾慶紅勢危習近平冇面俾成龍救子頭痕

2014-08-27 21:12:00

有雜誌報道指成龍靠山曾慶紅（左圖）勢危，令成龍營救祖名增添變數。（資料圖片）

房祖名與柯震東因為喺北京涉吸毒被捕，身為祖名爸爸﹑中國禁毒宣傳形象大使兼全國政協委員嘅成龍，對於兒子犯錯，成龍上星期喺微博直認教子無方，又話自己都要負責任，替祖名一起向社會公眾鞠躬道歉。

多年來，成龍憑電影喺內地狂吸金，兼且亮出愛國大旗，落足鞋油頻向北京獻媚，成龍多番爆出謬論，包括「中國人是需要管的」﹑又指香港「太自由了」﹑「香港變遊行之都」等等，言論惹非議，又引人反感，除咗成為港人箭靶，更入選強國網民嘅中國人渣榜。

今日有雜誌詳細報道，身為全國政協委員兼人脈極廣嘅成龍，其靠山原來係隸屬江澤民系統嘅國家前副主席曾慶紅人脈網，至於曾慶紅細佬曾慶淮，則在掌控娛樂圈嘅國家文化部，有極大勢力。

而文化部專門審查藝術團體有冇政治不正確，手握電影電視牌照批文嘅生殺大權，曾慶淮喺佢哥哥曾慶紅任國家副主席年代，靠其關係獲中港娛圈老闆靠攏，不過近日曾慶淮被揭與薄熙來及周永康案關聯人物有合作，因而傳出佢係習近平打老虎嘅頭號目標，意味整個大陸文藝界亦受牽連。

祖名喺北京涉毒被捕，更自爆毒齡有八年，據報道所講，成龍獲悉兒子被捕後，曾透過其直通官場嘅富商巨頭，以及一眾人大政協好友奔走，甚至有人希望出價擺平；唔少網民對龍之子喺強國被捕，均嘖嘖稱奇，據報道指，公安線眼早已留意祖名一段時間，最終選擇喺成龍不在北京時拘捕祖名，原因係有以防有人藉住個人人脈反擊。

由於內地嚴打「毒」害，成龍近年出盡鞋油向北京獻媚，不過習近平仍然冇面俾，令人聯想到今次真正惹禍嘅，會否係成龍擦鞋之餘，又捲入內地複雜官商政治。