�果日�- ���滴 - 左丁山

罷課點滴 - 左丁山

中文Y到中大參觀罷課之餘，忽聞有人闖入有線電視大廈，持開山刀、生果刀斬傷保安員，為之一驚，以為有神經失常漢子仿效內地「劈友」。好彩事件平息得快，次日看報，得知斬人漢只得19歲，乃大專生，因母親Cut（中止）有線寬頻合約不成，復被追月費，盛怒之下，欲闖有線搵吳天海出氣云云。


事件雖然不致釀成悲劇，網上迅速流傳黑色笑話，中文Y收到一張圖，再傳來俾左丁山一笑。呢幅統計圖係：「香港八大難事」：（一）買樓，二星半；（二）輪公屋，三星；（三）8號風球，三星半；（四）亞視執笠，四星；（五）HKTV（王維基）發牌，四星；（六）抽iPhone，四星半；（七）中六合彩，四星半；（八）Cut有線，五星。


網民認為Cut有線乃香港最大之難事，仲辛苦過買樓與中六合彩，認真搞笑，但相信有線中人會笑唔出，請佢地吸收教訓，改善服務啦。


中文Y大概得閒得滯，恃住係職業自由人，無固定返工時間，九月二十二日到中大參觀之後，九月二十三日又走去添馬艦聽關信基教授講課，佢話離開大學已久，自己除中文詩詞之外，對社會科學不甚了了，正好乘機聽吓啲著名學者講課，到添馬艦曬太陽之後，佢打電話嚟問：「你認為罷課可維持幾耐？」呢樣嘢好難回答，過往歷史經驗顯示，大學生吃軟不吃硬，只要政府當局唔好亂咁噏嘢，建制派大人物唔好開口夾着脷，已經會有不少溫和派學生不參加罷課。歷來罷課學生以理工醫商學生最不大熱心，商科生較現實，不打無把握的仗，理工醫學生因課程、功課比較艱深，要做實驗，難以抽空，輕易不敢走堂罷課，曾經參與一兩次就算。左丁山讀書年代，一位好有領導才能嘅港大醫科生係學聯會會長，熱心於搞學生活動/運動，走堂頻繁，左丁山曾勸過佢轉讀社會科學院，佢唔聽，卒之不能在醫學院畢業，我地好為佢可惜。文學院、社會科學院各系並不難讀，自己花時間刨書就得，罷課走堂冇乜所謂嘅，最多與一級榮譽無緣啫，故此罷課生以文社學院學生為主力，佢地亦最有堅持力。聽習近平對訪京富豪團嘅訓話，人大常委決定必須嚴格遵守，根本不會對香港民主派讓步，學生罷課只係體驗不可為而為之嘅精神而已。

HH