《時代》暢銷 - 左丁山
十月三日出版之「時代雜誌」（Time）（亞洲版，即在十月三日出街販賣之版本），以The Umbrella Revolution為封面，一片灰色迷濛嘅催淚煙之中，一位戴口罩男子高舉兩把雨傘，一大一小，其後有一個孭背囊男士低頭掩面，經「蘋果日報」考證，掩面男士就是吸入催淚彈濃煙嘅肥佬黎。呢個封面打動全世界，Time在香港特別暢銷，大記者在灣仔搜尋不獲，叫左丁山在中環報攤買一份嚟睇呀。
左丁山一口應承，隨後事忙又唔記得咗，拖到星期四（十月九日）坐地鐵去灣仔浙江軒食飯，路經「娛樂行」外嘅報攤，見到呢本Time，本想立即買下，但又諗住不如食完飯返公司之時先至買啦，費事拎吖嘛。點知下午兩時半回到報攤，報販話Time已經賣晒，於是急急腳走到戲院里報攤問，報販話：「算你夠運，剩番一本，賣完就清倉，呢期特別好賣，賣咗幾百本呀！」咁犀利？Time嘅銷量係靠訂戶，直接銷售比例好細，平時報攤每期賣到十本已經算夠運啦！報販話今次香港根本唔夠賣，Time要在亞洲其他地區搜集剩貨運來香港，沽清晒，佢又提醒左丁山：「明日（十月十日）嗰期Time以黃之鋒為封面，必定搶購，你要快啲手呀！」哦，原來每本零售價係65元，認真貴，只不過五十頁紙啫噃。左丁山自大學畢業開始已有訂購Time，直至兩年前秘書忘記續訂，自己亦覺得網上大把資訊，未必一定要睇Time，故此冇續訂，唔睇好耐咯。訂閱52期，每期只需17.2元，但零售價竟是每本65元，做長期讀者，唔訂閱就好蝕底。
佔領運動已近尾聲，造就咗黃之鋒成為世界著名學生及捧紅咗香港雨傘，建制派啲匿名寫稿佬傳出訊息，話黃之鋒媽媽係蘋果日報副總編輯，肥佬黎俾薪水養大黃之鋒，真係笑死人冇命賠，散佈謠言都搵啲似樣㗎，駛唔駛低劣到咁呀。講肥佬黎沽空一萬張期指，當然係不經大腦，左丁山抵唔住頸，寫咗一篇質疑之，一位讀者鍾先生睇完來電郵云，梁粉沽空期指反而比較可能，因為佢地容易知道幾時會放催淚彈及出動解放軍，推低大市喎。阿彌陀佛，千祈唔好咁搞，事到如今，陳日君樞機勸學生退場之言，發自肺腑，希望有人聽得入耳。
HH
没有评论:
发表评论