佔領．扶貧 - 左丁山
佔中三子發表聲明自首，呼籲學生撤離佔領現場，學生就是不聽，香港電台英文台訪問一位學生，學生簡單回答：「他們不是我們的領袖。」今時今日，要學生聽話，喺課堂內已經不易，課室以外，更加唔在講。佔中三子之中，兩位係教授，一位係牧師，平時講慣嘢，但現時學生已經騎上虎背，特區政府堅決唔肯退讓少少俾個下台階啲學生，年輕人難以吞下一口氣，點肯聽話撤退吖。特區政府set定個史碌架俾學生（不讓步，不主動清場），旨在全殲對手銳氣，不留餘地，若然學生決定硬碰硬，正好中計，俾政府警察乘機發洩六七十日來積累嘅躁火而唔駛負上太大責任。
梁振英在「香港經濟峯會2015」講經濟前景，出到會場見記者就講佔領運動，引用民意話：「是可忍，孰不可忍」，又話警察克制忍耐並不是軟弱。咁講法，即係暗示就快郁手清場咯，而且警察視乎學生反應，未必會留手，恐怕流血必矣，難怪佢講完話，上咗電視之後（十二月一日），本已疲弱下滑嘅股市，下午立即跌多二百點，全日跌620點，報23367點，與一月二日嘅23340比較，恒指全年升幅冇晒。
較早前（十一月二十九日），梁振英宣佈就佔領青年多項訴求及青年難向上流問題，委託「扶貧委員會」轄下專責小組全面檢視，在教育、就業、培訓方面提出具體建議，協助青年人「助流動，增收入」。
由扶貧委員會研究後佔領之青年問題，跡近搞笑，班學生上街爭取真普選，並非因為冇飯開，並非江澤民在上海交通大學時代，鼓動學生上街反蔣反國民黨，以反飢餓為藉口。大學生畢業後，雖然絕大部份係14K（收入），但實情香港多年來藏富於民，2014年之22歲畢業生，比1967暴動年嘅22歲畢業生有錢好多，當年港英大搞青年舞會，推流行音樂會得到一定程度嘅成功，如果今日又搞流行音樂青年舞會，老套out晒㗎啦。學生佔中，與貧窮上流無關，基本上係一個政治問題，係中共中央絕對嚴控本港政治發展嘅問題，叫扶貧委員會研究青年上流喎，就係顧左右而言他，轉移視線，一啲誠意都冇。但講真，你想佢點吖，上頭話明三個堅定不移喎，夠聽話先至唔會忽然腳痛心痛呀！
I
没有评论:
发表评论