蘋果日報- 長和重組 - 左丁山

http://hkm.appledaily.com/detail.php?guid=19002571&category_guid=vice&sup_id=12187389&category=daily&issue=20150115

長和重組 - 左丁山

上星期五下午午飯過後，收到大編輯通知，李澤鉅會在是日適當時候見記者，其後又來電修正，話已經改為正式記者會，當然係在股市收市後，大約係下午四時半。記者好敏感嘅，李澤鉅好少會一個人無端端見記者嘅啫，長實集團撞到正，梗係有重要消息啩？於是人同此心，可憐何俊仁亦在下午開記者招待會，立即少咗的傳媒理會。免費報嘅記者本來好多在星期五放假嘅，有兩位正在行山，收到柯打，唯有擒擒青落山，趕返中環，成副行山裝束衝往長江中心。


果然真係極為重要，長江和黃集團高層全部現身由李嘉誠率領，李澤鉅、霍建寧、葉德銓、陸法蘭及法律顧問坐齊喺度。重要宣佈就係長實（0001）與和黃（0013）合併為一間公司，在開曼群島註冊，叫做Cheung Kong Hutchison Holding Limited（長江和記實業有限公司，簡稱CKH，長和），長實（0001）股東以一股換一股，取得長和股份，和黃（0013）股東以一股換0.684股長和，即是未來嘅新公司長和由現時長實股東佔59.38%，和黃股東佔40.62%。新公司正式成立運作之後，隨即分拆所有地產業務以「介紹形式」上市，分拆出嚟嘅純地產業務公司會叫做（Cheung Kong Property Holdings Ltd長江實業地產有限公司，簡稱CK Property長地）。


重組完畢後（預期在2015年六月底），1號仔長和會經營全部非地產業務包括碼頭、電訊、能源、基建、零售等等大項目，而長地（可能係13號仔或另外一個新上市編號）就經營所有香港、中國內地與海外地產及酒店業務，係「地產專門店」。全部過程還須股東大會通過，大股東（即李氏家族）不能投票，有小股東反對嘅話，不足為奇，但所有同類重組活動之中，成功與否嘅最重要因素就係股價，長和集團重組消息公佈後，在紐約嘅和黃，長實ADR急速上升，星期一（一月十二日）香港開市後，長實全日升咗14.4%收142.8元和黃上升12.5%收98.3元，證明市場已經以銀紙投票贊成重組，小股東實在搵唔到甚麼理由反對，除非與自己荷包鬥氣嘅啫，因此整個重組能夠順利如期完成，係一個合理期望。至於長和集團變相遷冊，實際上係嘅，但限於本港公司法，唔遷冊開曼群島嘅話，整個重組技術上幾乎不可能，大陸公司在香港或美國上市，亦要在開曼群島註冊，此乃商業世界大勢所趨，無謂過份詮釋。