2015年4月24日星期五

壹週刊 - 1311 - 優質生活 有望砌低你哋！　 Volkswagen Passat



http://hk.next.nextmedia.com/article/1311/17529564

近代汽車設計好興「改完=無改過」，太悶、欠衝擊，個人不太 buy。幸好八代（編號 B8） Passat改得夠徹底，設計上完全擺脫上代框框，大量運用橫向線條（車頭、車尾）規劃新車輪廓，我喜歡。 
有望砌低你哋！　Volkswagen Passat

壹號幹線

有望砌低你哋！　 Volkswagen Passat

做傳媒，好應該「有碗話碗，有碟話碟」。因此，話新款 Passat正到「天下無敵」，未免誇張。但這部預計到港將會賣「廿幾三十萬」的歐洲四門房車，確實是有足夠「斤兩」，去「揮低」起碼賣「三十幾四十萬」級別的 C仔、 3系、 A4等「越級對手」。講贏輸，仍言之尚早，不過上年一場聯賽盃，英甲球會米爾頓凱恩斯，確實曾以 4:0大比數，「砌低過」曼聯。換句話說：世事無絕對，乜都有可能發生。
細偈有計
汽車減磅同女性瘦身一樣，同屬畢生使命。新款 Passat較上代輕 85kg，關鍵是採用較輕量的 MQB車架，前後軸、轉向系統結構亦全面偷輕，但主要受力位，仍採用抗扭性達 30,000Nm/°的高拉力鋼。
 
底盤功架大大提升，「跑山」好彎兼且穩定，車廂隔音能力超卓；電軚可選配 progressive steering系統， lock to lock可由 2.75圈縮小至 2.1圈，操控反應更為緊湊。
 
典型福士橫間前座，兩側承托位比不少 sport seat更包身，送你大腿承托調節，頭枕更附設主動式安全結構，保證坐得安心。
 
加長軸距，後座腳位自然受惠，背墊角度又夠斜，又有獨立冷氣溫度調節，做老細車，一樣勝任。
全新中控台睇落未算很大視覺衝擊，不過細心睇 details位盡在冷氣出風口，巧妙用相同形狀的百葉簾修飾貫穿車廂。另外，講設備一樣夠齊夠豪，計有輕觸式屏幕、電子手掣、 hold掣、三區冷氣、變色燈光……等。
 
講 size，新車比上代闊 12mm及矮 14mm，長度反而短 2mm。點解睇落仲大部過以前？「竅妙位」是拉長軸距 79mm（ 2791mm），再將前軸移前 29mm，後軸又移後 17mm，務求偷盡所有空間，直接令整個坐艙拉長 33mm。

Passat為福士首部採用 12.3吋 Active Info Display儀錶車款，解像度達 1,440x540，對應多項行車資訊，導航更可作 2D或 3D顯示， functional得來又有型，但相信要較高級版才可選配。
 
玩開 Hi-Fi，一定知 Dynaudio是喇叭單元專家，最出名是重播人聲及中低頻，襯 Passat寧靜車廂， fit到漏。
 
若選配 DCC（ Dynamic Chassis Control）系統，避震會再調低 10mm，亦可選擇多種駕駛模式，想慳油、揸得舒服抑或劈個痛快，隨你話事。
在汽車設計學上，頭燈設計往往擔當着「決定生死」角色。新 Passat「眼神」極之銳利， LED日行燈已屬 standard設備，想高級點，大可升級至全 LED結構。
 
車尾設計較為穩陣大路，幸好尾燈已是 LED設計，梯形死氣喉也能爭回些少收視。
尾廂闊落程度（ 586公升）直逼爆燈級數，間隔夠闊又夠深，兩邊各有抽手可將後座瞓平，好使好用。
 
測試車採用 1.4 TSI引擎，受惠於牌費優勢，估計將會是到港後重心配搭。 150匹睇落沒甚看頭，其實焦點應落在低轉已可全面釋放的 25.5kgm扭力上，起步爽快，配合 turbo技術，尾段衝刺一樣頗有睇頭。
壹車在手
想睇最有動感試車片段，想掌握全城
最強汽車資訊，就要 bookmark「 nextcar.next.hk」到你部 smartphone！
話你知
現階段，新 Passat將有五台汽油引擎配搭，分別為兩台 1.4公升（一台自然吸氣、一台 turbo）、一台 turbo 1.8公升及兩台 turbo 2.0公升，輸出由 125匹至 280匹。

第八代 Passat亦同時推出了 Variant旅行版，無奈福士香港表示過往會購買旅行版顧客只佔小量比重，因此獲與 Golf 7 Variant相同遭遇，即不考慮引入。
撰文、攝影：廖宏俊（意大利撒丁島）

© 2015 Next Media Interactive Limited. All rights reserved. 版權所有　不得轉載


TRUONG Nhieu Hang



发帖者 时间：

没有评论:

发表评论

订阅： 博文评论 (Atom)