【帶媽媽出走】辭職一起去浪遊
童年時，我們對媽媽的愛宣之於口，不含蓄、不害羞。記者問過許多小朋友想和媽媽做些甚麼事，他們都不假思索，想和媽媽打乒乓球、羽毛球、去海洋公園、「送我上學」……
人長大，堆積如山的工作和約會，卻讓我們越來越晚回家，把媽媽冷落了。有個廿六歲教師辭職獨自流浪大半年，在西班牙遇到一個寄宿家庭，看見他們甚麼都與家人分享，對家人愛護有加，一家人就是最歡樂的時光，卻想起自己遺下媽媽獨自出走，是何等的自私，衝動下致電在港的媽媽，「阿媽，不如辭職唔好撈，揹背囊過嚟歐洲同我玩兩個月？」「哦，好呀！」這兩句仿似戲言的對話，成就了兩母子的歐遊之旅。有幾多人可以像他，兌現童年時想過和媽媽做的事。
曾兆韜的成長過程可謂一帆風順，公開試當上尖子，入讀科大精算，畢業後任職中學教師，從小到大，他都活在別人的期望下，他直言自己好勝，喜歡別人稱讚，順利的成長過程令他變得自我中心，未經歷過大挫折的他，「以為自己乜都好叻」，二○一三年他毅然辭去月薪數萬元的教席，離開活得舒服順利的環境，到外地流浪一年，希望沿路會遇上不同的挫折，藉此挫挫自己的銳氣。
他從深圳出發，沿途靠截順風車到過新疆、印度、尼泊爾及伊朗等多個國家，二○一四年一月，他抵達西班牙，在當地打工換宿了兩個月，試過當保母、也試過鋸木，其間寄宿在一對教書夫婦的家中，看見他們甚麼都與家人分享，不期然想起留在香港的母親袁明華，他一直都知道五十一歲媽媽的夢想是到歐洲旅行，「一時衝動」下，決定邀請在幼稚園任職的媽媽辭職和他歐遊，曾媽媽說：「當時諗係咪真㗎？定係𠱁我㗎？」曾兆韜又叫媽媽拿出世界地圖，向她初步講解旅行的路線圖，二人越說越起勁，曾媽媽知道兒子不是「口糠糠」，「信得佢過」，便決定回公司辭職，「難得個仔有時間，今次唔去未必再有機會」，旁人擔心她「去完返嚟點算」，她卻豪言：「諗咁多做咩？去咗先算啦！」
從馬德里開始 求婚勝地看日落
回想起兒子二○一二年首次向自己說出流浪的念頭，「嗰陣叫佢做多一年嘢先，其實係想佢諗清楚。」但母親又怎會不了解兒子性格，「都知佢講得出做得到，咁大個仔，都係時候放手，唔再對佢樣樣照顧。」
闊別大半年，兩母子去年三月在西班牙馬德里機場重逢，曾兆韜曾幻想會有些驚天動地、二人相擁流淚等老土情節，但雙方卻出奇冷靜，「第一個感覺係好搞笑，未見過阿媽揹住大背囊。」曾媽媽雖開心，但也沒有太激動，「可能我性格比較內斂，唔會攬住佢嚟錫。」
二人由西班牙馬德里出發，先後遊歷過巴塞隆拿、意大利、德國、奧地利、捷克、柏林、希臘及土耳其，「自己獨遊時會不理死活，瞓街瞓車站，隨心plan行程，但同阿媽一齊，點會咁不孝？」為求媽媽安心，曾兆韜一早計劃好行程食宿，個人窮遊的八個月間只花了兩萬五千元，和媽媽遊玩的兩個月，卻花了八萬元。
希臘聖托里尼島的藍頂小白屋是兩母子最回味的地方，曾媽媽說：「嗰度真係好靚，同電視睇好唔同。」曾兆韜卻笑說：「多數人去嗰度都係求婚，但我就同阿媽去睇日落，感覺好特別。」曾媽媽會心微笑的說：「佢係我支盲公竹，帶我去咗好多地方，例如在奧地利住咗間好靚的酒店，威尼斯又好靚……」
朝夕相對兩個月 爭執體諒了解
昔日在香港，兩母子獨處的機會少之又少，但歐遊的兩個月，朝夕相對，日日都可盡訴心中情，但其實互相都有壓力，「例如我好享受蕩失路，但阿媽會好驚；我唔鍾意坐太多交通工具，但阿媽行得耐會攰。帶住阿媽去旅行個心情係好起伏，去到一些地方見到佢好開心，自己都會好興奮，但去到某些地方，見佢冇我預期之中的反應，會覺得好洩氣。」曾試過專程帶媽媽參觀意大利羅馬的聖大教堂，但她的反應卻是「乜係咁咋？」「嗰刻係覺得好灰，原來大家睇同諗嘅嘢都唔同，我一心帶你嚟睇，你就咁樣，又話攰，事後都覺得自己好衰仔。」曾媽媽又說：「年紀大了，旅途中經常要搵廁所，又唔行得耐，兩個人試過幾次因為咁鬧交。」曾兆韜坦言：「我知阿媽好大壓力，覺得自己拖累我，我其實係好傷心，會諗番係咪應該以阿媽為中心呢？最緊要佢舒服。阿媽旅程中好少抱怨，其實我知佢付出咗好多。」
曾兆韜覺得媽媽在旅程中就像變了個小朋友般，雀躍地在街頭露天茶座邊飲咖啡邊拍照，兒子又教她用西班牙文問路，在打工換宿的家庭，曾媽媽更特意煮了一道中餐，與屋主交流廚藝。這趟旅程兩母子更第一次一齊睇波，一齊去酒吧飲啤酒……這都是他們從未想過會一起做的事。
縱使旅程中有爭執，但卻是雙方增進了解的必經過程，歐遊兩個月回港後，兩母子關係更勝從前，亦不時拿出旅遊照片回味一番，已重投教育界的曾兆韜，工作比以前更忙，但每逢星期六都會盡量抽時間陪媽媽吃早餐，問到旅程中印象最深刻的畫面，曾滿足地說：「都係好細水長流，我最初只係單純為咗幫阿媽圓夢，但旅程中得到的比我想像中多很多，亦慶幸在媽媽身體仍然健壯的時候帶她旅行，機會可能是可一不可再了。」
我想和媽媽做的事……
編輯：黃子配
美術：吳子豪
I
没有评论:
发表评论