拜成吉思汗
九月三日北京大閱兵，肥仔K就飛往內蒙古呼和浩特參加留日同學嘅婚禮。留日同學在中文大學畢業及獲得日本文部省（教育部）獎學金到日本讀碩士，咁啱與肥仔K住埋同一間國際學生宿舍，於是大家成為相熟朋友，呢位朋友嘅姓氏以漢語拼音，第一個字就係X，故稱之為X同學。X同學在日本打工，與一位內蒙女孩拍拖成功，故此走去呼和浩特之女家舉行婚禮，肥仔K等十個留日本同學一來要捧場，二來蒙古草原有吸引力，於是各自前往。
肥仔K早上往機場，中午上到機，下午到成都，轉機往呼和浩特，到達時已經夜幕低垂，乜都睇唔到，第二日參加旅遊活動，往大草原領略內蒙風光，草原一片平靜，但最令肥仔K矚目嘅，就係巴士經過一列高樓大廈，每座二三十層高，座數多到數唔清，有如沙田第一城。第一城就住滿人箒，肥仔K經過見到嘅住宅大廈就似乎空無一人，往大廈小馬路有野草叢生，似係外文報紙報導過嘅中國ghost town（鬼城）。與X同學結婚嘅蒙古女孩子家人住在平房，據講家族無人願意住在高樓，然則呢啲住宅大廈為誰而建，實在是一個謎。興建大樓屬於固定投資，係GDP一部份，中國GDP之中，隱藏不少死資產，鬼城就係最大一類。
X同學穿着蒙古新郎禮服，在蒙古包內完婚，行禮如儀之後，眾人面向成吉思汗大照片前，祈求幸福順景，當成吉思汗係神咁拜。蒙古歷史上最偉大之霸主/猛將，非鐵木真成吉思汗莫屬，今日漢人拜關公，蒙古人拜成吉思汗，道理相同。北京舉行抗戰勝利70周年大閱兵，顯然就係對內立威，對外示威，示威對象當然係台灣、日本、美國啦。中日歷史上第一次戰爭，究竟係幾時呢？肥仔K讀日本資料，話記載得比較詳細嘅就係鐵木真之子忽必烈派兵征日，兩次都因蒙古兵不熟水性，戰船遇颱風（日本人稱之為神風）潰敗而回，但原來元兵第二次征日，前鋒在九州登陸，後援兵還在海上埋唔到岸，接應不及，日本軍師（宋朝遺臣，避元逃日為僧）竟是漢人，早已計算得到，於是日軍圍攻登陸元兵，大勝一仗。之後歷史上中日打仗（明代、清代、當代）中國未嘗戰勝，可惡可哀可嘆也；老實講，70年前日本投降，係美國幫手出兵，中國至可以成為勝利國啫。
I
没有评论:
发表评论