年初方位預言
往日本旅行前，已知有天津氣體大爆炸，轟動全球。跟住就有印尼內陸飛機失事，曼谷中心區四面佛前炸彈爆炸，而且收到不少短訊查問左丁山是否人在曼谷。多謝朋友關心之餘，心有惻惻然。諗吓，諗吓，是否今年世界運程主凶呢？心念一動，叫秘書傳來今年一月尾嗰幾篇「GG細語」，講羊年運程嗰幾篇。現代科技冇得彈；肥仔K在日本為左丁山租咗一隻WiFi蛋，折算50幾蚊港元一日，事先直送福岡Grand Hyatt酒店櫃枱，左丁山Check-in之時就攞到，靠此WiFi蛋，手持iPhone到處可與香港、曼谷友人交談，得到最新消息；到最後一天離開福岡嘞，就將WiFi蛋及插蘇放回在一個大回郵信封內，交酒店職員寄回東京，真係方便到冇得頂。
秘書好快傳來2015年1月27日本欄文字，當日引述傅沛基先生（易學會會長）講，「東南巽方屬龍蛇，有二黑星，當黑也；中國之東南就係東南亞，提防星馬在羊年當黑；正南離位屬火有七赤，主有騙財呃錢，破財等事情，在南方慎防受騙……西方屬金，主有災難病源，金受侵襲亦象徵金融不穩，在一片減息量寬大潮流之中，黑天鵝偶發事件會突然之間破壞一片唱好之牛市，令散戶猝不及防……」七個月之後，再讀此文，哎，雖不中亦不遠矣，東南亞有星加坡李光耀病逝，馬來西亞總理捲入貪污風暴，遭前總理叫下台，外匯大跌；泰國有人甘冒大不韙，敢膽得罪四面佛，在十字路口引爆炸彈，印尼就連續有空難，更想唔到嘅係，股市大時代咁快結束，"Sell in May and go away"原來係投資真理。股市8月就爆晒煲咯，傅會長還在「經濟日報」講過，農曆三月（辰）、五月（未）、九月（戌）及十二月（丑），宜特別事事留神，切勿掉以輕心！
在返回福岡之子彈車上，睇到舊文，喺有慶幸自己買股票夠保守，假期旅行選日本，捨曼谷，本來話趕住九月第一個星期有特別假期，再去曼谷行街嘅，依家左太極力反對，唯有放棄。
子彈車個多小時就回到福岡博多站，立即去租車直奔大分別府，點知成個博多站內外嘅租車公司全部話冇車，已全部租出，於是唯有好唔忿氣咁去搭火車，晚上去到大分，乘的士入住海旁晴海酒店，每個房間內有溫泉浴，可浸溫泉望海，疲勞盡消矣。
没有评论:
发表评论